Plani i policisë për të parandaluar krimet mjedisore në vend, është prezantuar sot nga Zv/Drejtori i Përgjithshëm i Policisë së Shtetit, Albert Dervishaj. Në një deklaratë për mediat ai tha se vetëm në dy javët e fundit janë evidentuar 215 raste të tilla. Janë 1456 policë të angazhuar për parandalimin dhe zbulimin e këtyre shkeljeve.
Policia ka arrestuar vetëm 23 persona, 184 janë vënë nën hetim në gjendje të lirë ndërkohë që 6 të tjerë janë shpallur në kërkim.
Vetëm për 24 orët e fundit janë evidentuar 6 raste që kanë të bëjnë kryesisht me veprën penale “Menaxhimi i mbetjeve”, ku janë konstatuar kamionë që transportonin inerte, të cilat i kanë hedhur jo në vendet e përcaktuara, por kryesisht buzë rrugëve dhe lumenjve.
Po kështu, shqetësuese mbeten ndërtimet pa leje, janë evidentuar 97 raste të tilla; prerja e paligjshme e pyjeve, janë evidentuar 55 raste dhe janë sekuestruar rreth 100 metër kub lëndë drusore e prerë në mënyrë të paligjshme. Po kështu shqetësuese janë edhe gërryerja e lumenjve, djegia e gomave dhe e mbeturinave, duke shkatuar ndotje të ajrit.
Discussion about this post