Një plagosje ka ndodhur mbrëmjen e sotme në zonën e Fllakës, në Durrës, pranë kufirit me zonën e Shënavlashit, ku një 36-vjeçar është qëlluar me armë zjarri. I lënduari, i identifikuar si Arbër Goreja, raportohet se ndodhet jashtë rrezikut për jetën.
Sipas burimeve, autorët kanë qëlluar nga një automjet në lëvizje, tip “Ford”, duke goditur 36-vjeçari në krahun e majtë me pistoletë. Pas të shtënave, i plagosuri arriti të shkonte vetë në Komisariatin e Policisë për të kërkuar ndihmë dhe transport drejt spitalit.
Burime bëjnë me dije se 36-vjeçari kishte qenë i plagosur edhe dy vite më parë në një atentat tjetër.
Në një njoftim paraprak, policia tha se ngjarja dyshohet të ketë ndodhur për motive të dobëta.
“Rreth orës 20:00, në zonën e Fllakës, dyshohet se për motive të dobëta është plagosur me armë zjarri shtetasi A. G., 36 vjeç, banues në Durrës, aktualisht jashtë rrezikut për jetën. Aktualisht, ai ndodhet në sallën e operacionit në Spitalin Rajonal të Durrësit, ndërsa forca të shumta policie janë të pranishme në spital dhe në vendin e ngjarjes. Hetimet vazhdojnë për zbardhjen e plotë të ngjarjes dhe identifikimin e autorëve”, tha policia.
Discussion about this post