Besimtarët po kremtojnë Krishtlindjet kudo në Shqipëri, ndonëse në kushte të pazakonta për të dytin vit rradhazi për shkak të virusit Covid-19 dhe versioneve të tij. Në Elbasan mesha e vigjiljes së lindjes së Krishtit u mbajt në një qendër rinore, për shkak të rinkonstruksionit që po i bëhet kishës së këtij qyteti. Ndërkohë në Lushnje atmosfera e festave duket se zbuti dhe tensionet politike, duke bërë bashkë deputetët e qytetit, Lindita Buxheli dhe Bujar Çela.
Mesazhe paqeje në këtë ditë erdhën dhe nga qytete si Berat, Korçë, Gjirokastër , Durrës, Lezhë e Fier, qytetarët e të cilëve ndoqën meshën dhe uruan besimtarët kudo në Shqipëri. Përfaqësuesit e këtij besimi fetar dhanë mesazhe dashurie dhe shprese në këtë vit të vështirë pandemik, që kufizoi festimet e besimtarëve.
Kryepeshkopi Anastas Janullatos dha mesazh force për të gjithë duke cituar vargje biblike dhe duke iu rikujtuar besimtarëve që Perëndia është me ta më çdo vështirësi që po kalojnë, ndaj duhet të luten. Imzot Angelo Massafra, kryeipeshkvi i Shkodër-Pultit e Presidenti i Konferencës, uroi poashtu besimtarët. Ndërsa At Gregor Pelushi u shpreh se mesazhet e urimit sjellin shpresë tek njerëzit në këto momente të vështira.
“Kjo është festa më e madhe për të krishterët ortodoksë, nëna e festave sepse këtu zë fill krishterimi, që përgjatë këtyre viteve u ka sjell gjëra të mira njerëzimit. Dita më e gëzuar për të gjithë ne, lindja e Krishtit. Jetojmë në një kohë që përballemi me jetën dhe vështirësitë por mesazhet që na vijën këtë të premte përcjellin shpresë mirësi dashuri. Ne lutemi që çdo ditë njerëzit të jetojnë në këtë mirësi e dashuri, një periudhë për të reflektuar në marrëdhëniet me zotit dhe me njëri-tjetrin. Të ketë paqe dashuri, në marrëdhëniet familjare, por pe jo me të gjithë kombet. Është dita e madhe që përçon mirësi e dashuri”, u shpreh ai.
Politika uroi festën, ku presidenti Ilir Meta bëri thirrje që në këtë ditë të sensibilizohemi me personat që kanë nevojë për përkujdesje. Ndërsa Lindita Nikolla e cilësoi këtë ditë si një moment ku shpresa fiton ndaj vështirësive.
Kryeministri Edi Rama, i uroi krishtlindjet përmes një kartoline, të cilën ja kanë dërguar nga Thumana.“Krishtlindjet janë me të vërtetë Krishtlindje, kur kremtohen duke u dhënë dritën e dashurisë atyre që janë më nevojtarët për të.”
Kryetari i Partisë Demokratike Lulzim Basha shkruan se një ditë si kjo mbush me shpresë qytetarët dhe shton besimin për të ardhmen e fëmijëve.
Ambasada e Shteteve të Bashkuara, përmes një kartoline ka dërguar një mesazh për shqiptarët, duke iu uruar gëzim dhe paqe besimtarëve.
Discussion about this post