Dy ortakët Sandër Shpati dhe Gjokë Ograja e kanë bashkinë e Vaut të Dejës thesarin ku marrin sa para të duan. Tenderat i rregullon kryebashkiaku Kristian Shkreli. Këtë gjë e kanë mësuar tashmë të gjithë operatorët e tjerë të tenderave, prandaj nuk afrohen të bëjnë oferta.
Në prokurimin e fundit të Bashkisë Vau i Dejës mori pjesë vetëm kompania “Ndërtuesi 2014” shpk me administrator Sandër Shpatin.
Objekti i tenderit është “Përmirësim i infrastrukturës kryesisht në zona informale që janë në proces legalizimi, në zona banimi me mungesë sherbimesh si ujësjellës, kanalizime ose ku këto shërbime janë të papërshtatshme”. Ju duket emërtim i gjatë? Sa më e madhe vjedhja, aq më shumë fjalë përdoren për ta mbuluar.
Fondi limit i caktuar është 62 500 000,00 lekë pa TVSH dhe në dosje nuk ka asjë asnjë projekt apo ndonjë argumentim se si është përllgaritur shuma e fondit. Dhe më 11 shtator 2025 është mbajtur tenderi me një pjesëmarrës, “NDERTUESI 2014” shpk me ofertë 57 782 924,00 lekë pa TVSH.
Open Data Albania e ka shënuar procedurën me “Flamur të kuq”, që është shenja e riskut të korrupsionit.
Komisioni i Shkrelit ka mbaruar punë shpejt, ndërsa kryebashkiaku i ka dërguar kompanisë private formularin e shpalljes se fituesit më 22 shtator 2025. Pra, pasi bëri tender me 1 person, e telefonoi mikun e vjetër: Eja, merri këto lekë!
Sandër Shpati i favorizuar në vite në Vaun e Dejës
Shkreli nuk është i pari kryebashkiak që firmos tendera korruptivë në favor të Sandër Shpatit dhe Gjok Ograjas. Një procedurë prokurimi me probleme është shënuar qysh në vitin 2021. Në kohë kur Bashkia e Vaut të Dejës drejtohej nga kryetari Mark Babani, kompania e tyre mori tenderin me objekt “Shërbim pastrimi për vitin 2021, 2022, 2023” me fond limit 62,882,080 lekë të reja pa TVSH. Së pari, vihet re konkurrenca është tepër e cunguar pasi kanë marrë pjesë vetëm 2 konkurrentë. Së dyti, duke parë vlerat e ofertave të dy konkurrentëve shikohet se për habi se ka fituar kompania që ka ofruar vlerën më të lartë.
Vazhdojmë më tej në vitin 2023. Blendian Dalipi i OST i ka dhënë kësaj firme gati 2.3 miliardë lekë të vjetra.
Bëhet fjalë për procedurën me numër reference REF-79551-09-11-2023 dhe me objekt “Ndërtim i kolektorit kabllor, N/Stacioni Plazh Velipojë, ndërtim i fidrave kabllorë 20kv F1 dhe F2, kabina 20 kv dhe rrjeti TU me ABC”.
Ky tender ka si fond limit shifrën 191,327,059 lekë të reja pa TVSH ose rreth 2.3 miliardë lekë me TVSH.
Nga dokumentacioni përkatës i tenderit vihet re se kanë marrë pjesë vetëm dy garues. Nga këta, njëri nuk ka ofruar asnjë vlerë, pra zero lekë. Në këto kushte mbetej që fituesi i vetëm të shpallej ai që ka dhënë ofertë. Rrjedhimisht fituese është shpallur firma NDERTUESI 2014 në pronësi të Sandër Shpati dhe Gjokë Ograja, në bashkëpunim me kompaninë PREKA,
Ndërsa më 23 qershor 2024, kryebashkiaku Kristian Shkreli i ka dhënë kësaj firme tenderin “Sistemim, asfaltim i rrugëve të brendshme Kosmac”, me një fond limit në vlerën 45,833,333 lekë të reja pa TVSH ose gati 550 milionë lekë të vjetra me TVSH.
Firma e Sandër Shpatit ka ofruar vlerën 45,310,506 lekë të reja pa TVSH ose rreth 540 milionë lekë të vjetra me TVSH. Pavarësisht se kjo është oferta më e lartë e dhënë nga të gjithë pjesëmarrësit në tender, Shkreli e ka shpallur fituese.
Përveç kësaj, dyshimet shtohen më shumë kur vihet re se vlera fituese është sa 99% e fondit limit të tenderit.
Kristian Shkreli nën hetim nga SPAK
Kryebashkiaku socialist i Vaut të Dejës, Kristian Shkreli nuk është i panjohur për drejtësinë, prandaj nuk e ka problem të bëjë tendera fiktivë si ky më sipër.
Më 25 prill, 15 deputetë kanë kërkuar verifikimin me urgjencë të kandidatit të PS në Vaun e Dejës, Kristian Shkreli, pasi rezulton se në vitin 2021, kur ka qenë kandidat për deputet nën siglën e PS, nuk ka deklaruar dëbimin e tij nga Italia në vitin 2007, në formularin e dekriminalizimit.
Në vitin 2023 ai ka deklaruar dëbimin, por pa dhënë arsyet e dëbimit, duke fshehur faktin se ai është dëbuar për kryerjen e një vepre penale.
Së fundmi, Shkreli është marrë i pandehur për një vepër tjetër, për korrupsion zgjedhor. Pas fletëthirrjes së dërguar nga SPAK, Shkreli, më 3 tetor 2025, është paraqitur në prokurori i shoqëruar nga avokati i tij.
Në kuadër të një hetimi që po zhvillon për korrupsion zgjedhor, 4 ditë pas zgjedhjeve më 15 maj 2025, SPAK urdhëroi sekuestrimin e celularit të kryebashkiakut socialist të Vaut të Dejës, Kristian Shkreli.
Prokuroria e Posaçme kishte marrë më herët autorizim në Gjykatë për kontrollin personal të kryetarit të bashkisë, vendim që u zbatua nga Byroja Kombëtare e Hetimit në bashkëpunim me Policinë e Shtetit.
Shpresojmë që telefoni i tij të ketë nxjerrë materiale edhe për korrupsionin me tenderat.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post