Mbi 86 mijë persona pritet të udhëtojnë mesatarisht çdo ditë gjatë gjithë muajit gusht në afro 500 fluturime direkte mes Italisë dhe Spanjës. Një shifër më e lartë se numri i banorëve të qyteteve si Como apo Fiumicino. Vendosja e kontrolleve reciproke kufitare mes dy vendeve evropiane duhet të përballet pikërisht me këto volume të larta ditore udhëtarësh, sipas një analize të Corriere della Sera, bazuar në të dhënat zyrtare dhe platformat e specializuara.
Lidhja mes Italisë dhe Spanjës nuk është vetëm një nga korridoret ajrore më të ngarkuara në Evropë. Ajo është gjithashtu një nga më të rëndësishmet për fluturimet ndërkontinentale. Nuk bëhet fjalë vetëm për udhëtarët që fluturojnë drejtpërdrejt nga një qytet italian drejt një qyteti spanjoll dhe anasjelltas, por edhe për mijëra persona që çdo ditë kalojnë tranzit përmes aeroporteve kryesore të dy vendeve për të udhëtuar jashtë Evropës ose për t’u rikthyer në kontinent.
Gjatë javës 31 korrik-6 gusht të këtij viti, mes Italisë dhe Spanjës janë kryer mesatarisht 540 fluturime direkte në ditë, në të dyja drejtimet, sipas të dhënave të Eurocontrol, agjencia evropiane që koordinon lëvizjet ajrore në hapësirën e kontinentit. Kjo shifër është 9% më e lartë krahasuar me një vit më parë dhe 25% më e lartë krahasuar me të njëjtën javë të vitit 2019.
Sa i përket numrit të udhëtarëve, gjatë gjithë muajit gusht kompanitë ajrore kanë nxjerrë në shitje rreth 2.9 milionë vende në fluturimet direkte mes Italisë dhe Spanjës, sipas të dhënave që kompania e analizave të aviacionit Cirium i ka vënë në dispozicion Corriere della Sera.
Me normën aktuale të mbushjes së avionëve, e cila është mbi 92%, kjo do të thotë se gjatë gushtit pritet të udhëtojnë pak më pak se 2.7 milionë persona, duke llogaritur të dyja drejtimet.
Kompanitë ajrore me kosto të ulët Ryanair, Vueling dhe Wizz Air do të ishin më të prekura nga kontrollet, pasi janë pikërisht ato që ofrojnë numrin më të madh të vendeve në fluturimet mes dy vendeve.
Megjithatë, pasoja edhe më të mëdha mund të ketë për kompanitë ajrore tradicionale, si Iberia, Ita Airways dhe Air Europa, modeli i biznesit të të cilave mbështetet edhe te kalimi tranzit i pasagjerëve përmes aeroporteve të tyre kryesore, përpara se ata të hipin në një fluturim ndërkontinental.
Në rastet kur koha mes dy fluturimeve është e shkurtër, kontrollet e reja mund të rrisin ndjeshëm rrezikun që udhëtarët të humbasin fluturimin e tyre të radhës.
Sipas të dhënave të Cirium, Romë Fiumicino-Madrid, Romë Fiumicino-Barcelona, Milano Malpensa-Barcelona, Milano Malpensa-Madrid dhe Romë Fiumicino-Ibiza janë linjat ajrore më të ngarkuara gjatë këtij muaji.
Në total, llogariten 172 linja direkte që lidhin 29 qytete italiane me 22 destinacione në Spanje, duke treguar përmasat e trafikut ajror mes dy vendeve dhe ndikimin që kontrollet kufitare mund të kenë te miliona udhëtarë gjatë pikut të sezonit veror./Corriere Della Sera
Discussion about this post