Ministrja e Energjetikës dhe Infrastrukturës, Belinda Balluku ka akuzuar opozitën se po përdor krizën aktuale për kredo politike, ndërsa shtoi se qeveria ka marrë të gjitha masat për të menaxhuar këtë krizë, duke iu referuar Paketës së Rezistencës.
Duke iu përgjigjur opozitës, e cila kërkon uljen e taksave të naftës, Balluku tha se një gjë e tillë nuk mund të bëhet, duke e cilësuar si sugjerim nga karrigia.
“Kjo është një krizë mbarë botërore që ka prekur çdo familje. Sigurisht më të prekurat janë shtresat në nevojë, prandaj qeveria ka ndërmarrë një paketë rezistence. Taksat qenkan vendosur për të goditur punën. Nuk e kuptoj as konceptin e fjalisë. Është Rama ai që hoqi taksat për biznesin e vogël. Si mund të thoni ju që këto taksa janë vendosur për të goditur punën. Ju që i keni pasur taksat më të larta. Ju e dini shumë mirë çfarë keni bërë për pensionet. Kjo është një paketë e tërë. Mbështetet në buxhetin e shtetit. Nëse do të hiqnim të gjitha taksat siç sugjeroni ju nga karrigia, por me cilat para do të kompensohet 3 mijë lekëshi që do t’u jepet njerëzve në nevojë. Si do ti kompensojmë ne të gjithë ata që përdorin transportin urban. Si do të kompensohen bujqit? Si do të kompensohen të gjithë familjet, të cilat sot nuk ekspozohen ndaj çmimit të energjisë”, tha Balluku.
Discussion about this post