Greqia i ka qëndruar shumë pranë qytetarëve të saj në këtë periudhë krize ekonomike. Shteti grek ka vendosur që t’u ofrojë familjeve subvencione për t’i ndihmuar të zëvendësojnë frigoriferët dhe kondicionerët e vjetër me pajisje të reja në mënyrë që të shmangin tarifat në rritje të energjisë elektrike.
Ashtu si shumë vende të tjera të Bashkimit Europian, Greqia është përfshirë nga rritja e çmimeve të energjisë, e cila ka nisur që pas nisjes së pushtimit të Ukrainës nga Rusia.
Greqia ka marrë masa duke vendosur një buxhet prej 7 miliardë eurosh duke përfshirë subvencione për familjet për të paguar energjinë elektrike dhe për të përballuar rritjen e çmimit të naftës.
Me vendimin e ri, familjet greke do të jenë në gjendje të blejnë deri në tre pajisje të reja që shpenzojnë më shumë energji elektrike, duke përfshirë kondicionerë, frigoriferë etj. Ato do të përfitojnë subvencion nga 30 deri në 50% të kostos për çdo pajisje.
“Sipas programit që shpallim sot, ne i japim mijëra familjeve mundësinë për të ulur ndjeshëm koston e energjisë elektrike”, tha ministri i Energjisë Kostas Skrekas në deklaratat televizive.
Discussion about this post