Qytetarët e Kosovës do të dalin sot në një protestë kundër propozimit të Zyrës së Rregullatorit të energjisë për shtrenjtim të rrymës. Sipas një njoftimi publik protesta do të mbahet nga ora 12:00, në sheshin “Zahir Pajaziti” në Prishtinë, nga ku qytetarët do t’i bëjnë të qartë qeverisë se nuk do lejojnë shtrenjtimin e energjisë asnjë cent më shumë. Ndër të tjera në njoftim theksohet se kjo barrë do të bjeri mbi qytetarët ndërsa bizneset do të pasurohen.
“Të dashur/a qytetarë/e të Kosovës. Ftoheni të merrni pjesë në protestën kundër shtrenjtimit të rrymës në Kosovë më datën 26 janar 2022 nga ora 12:00 në Prishtinë. Me 28 janar 2022 Qeveria e Kosovës pritet ta miratojë propozimin e ZRrE-së për vendosjen e bllok tarifës dhe rritjen prej 9% për të gjithë konsumatorët/et që shpenzojnë deri në 600 kwh, ndërsa rreth 200% rritje të çmimit për konsumatorët/et që e tejkalojnë 600 kwh.
Vendosja e bllok tarifës do ta afektojë jetën dhe buxhetin e secilit/ës prej nesh. Gjatë sezonës së dimrit konsumi energjetik i një familje mesatare në Kosovë e kalon në çdo formë 600 kwh. Kjo do të thotë që nëse ne e kemi paguar një faturë prej 58 eurove me tarifën e re do të paguajmë rreth 108 euro”, thuhet në njoftim.
Kjo protestë ka dy kërkesa: të mos aprovohet bllok tarifa e propozuar nga ZRrE-ja dhe të nacionalizohet KEDS-i.
“Përveç që i palogjikshëm, ky propozim do t’i pasurojë edhe më tej bizneset, në kurrizin tonë. Sipas propozimit, çmimi i energjisë për bizneset nuk rritet fare. Kjo i bie se një familje mesatare në Kosovë që synim e ka jetesën apo edhe mbijetesën, paguan edhe për bizneset që synim e kanë qarkullimin e fitimin. KEDS-it nuk i mjaftojnë 17 milion euro fitim në vit por e ka bërë argat ZRrE-në dhe Qeverinë e Kosovës që nga ky vit kësaj kompanie private t’i shumëfishohet fitimi. E gjithë kjo nga buxheti, edhe ashtu i dërrmuar, i qytetarëve/eve të Kosovës.
Këto shantazhe, ne qytetarët e këtij vendi nuk do i lejojmë kurrsesi. Në këto kushte, protesta mbetet e vetmja rrugë që ta parandalojmë barrën që mundohen të na ngarkojnë Qeveria e Kosovës përmes ZRrE-së e me KEDS-in. Andaj, ju ftojmë që të mërkurën, duke filluar nga ora 12:00, të mlidhemi e ta kundërshtojmë e ta parandalojmë këtë padrejtësi të rradhës ndaj nesh. Protesta nisë tek sheshi “Zahir Pajaziti” dhe përfundon tek ndërtesa e Qeverisë dhe ka dy kërkesa kryesore: Mos-aprovimi i bllok tarifës së propozuar nga ZRre-ja. Nacionalizimi i KEDS-it”, thuhet në njoftim. Prej kohësh Kosova po përballet me probleme me energjinë, madje shpesh herë qeveria është detyruar të ndërpresë shpërndarjen.
Discussion about this post