Pas përfundimit të mbledhjes së Këshillit të Ministrave, që u organizua dhe drejtua nga zv.kryeministri Arben Ahmetaj në mungesë të kryeministrit Rama, qeveria premtoi se do të mbrojë familjet dhe bizneset e vogla përballë krizës energjitike.
Ahmetaj tha kryeministri ka ngritur një grup ndërinstitucional për të menaxhuar situatën dhe gjatë javës do të dalë prezantojë planin për mbrojtjen e sipërmarrjes së vogël dhe familjarëve në nevojë.
“Çmimet lëvizin në vazhdimësi, çdo ditë. Një pjesë e mirë e vendeve e kanë transformuar koston te konsumatorët. Kryeministri ka ngritur një grup ndërinstitucional për të menaxhuar, monitoruar çdo moment ecurinë e situatës energjetike. Unë i referohem asaj që kryeministri ka thënë që vala e çmimeve ndërkombëtare prek edhe Shqipërinë, por ne jemi të bindur të gatshëm për të mbrojtur konsumatorin familjar dhe biznesin e vogël. Brenda javës kryeministri do të shpalosi vetë masat për mbrojten e qytetarëve dhe sipërmarrjes së vogël dhe në nevojë të qetësimit publik, ne do të vijojmë të mbrojmë konsumatorin familjar nga kriza e çmimeve dhe rritja e kostove për shkak të këtyre çmimeve. I garantoj qytetarët dhe sipërmarrjen e vogël që do të mbrohen nga qeveria. Paketa specifike do të lançohet nga kryeministri në ditët që vijnë. Dua ta ritheksoj se kryeministri ka krijuar një grup ndër institucional që monitoron dhe menaxhon situatën për ditë. Çmimet e energjisë nuk po rriten. Ne po i monitorojmë dhe kryeministri do të dalë me një paketë të plotë në ditët në vijim, që do të jetë mbështetëse për familjarët dhe sipërmarrjen e vogël”, tha ai.
Ahmetaj insistoi në fjalën e kryeministrit Rama kur tha se kriza në fjalë vjen për shkak të faktorëve gjeopolitikë në tregun global.
