Kryetari i Partisë Demokratike, Lulzim Basha pas përfundimit të mbledhjes me grupin parlamentar të PD, ka komentuar sërish krizën energjitike që pritet t’i kanoset Shqipërisë.
Në një deklaratë për mediet nga selia blu, Basha tha se në qendër të takimit me deputetët ishte rritja e çmimeve në tërësi, ndërsa shtoi se Rama ndonëse premtoi uljen e energjisë, bëri të kundërtën.
“Në qendër të vëmendjes ishte çështja e çmimeve në tërësi. Të gjithë jemi dëshmitarë, që çmimi i energjisë dhe i karburanteve rëndon biznesin dhe qytetarët. Çmimi i karburanteve ka një efekt në rritje të çmimeve të produkteve të tjera. Dua të kujtoj se Rama premtoi uljen e çmimit të energjisë. Dhjetëra familjarë kanë vrarë veten në qelitë ku janë plasur nga Edi Rama pasi nuk kishin para për të paguar çmimin e energjisë elektrike”.
Kreu demokrat tha se pyetja e rëndësishme është se çfarë u bë me Reformën e Energjisë, ku karburanti u shtrenjtua duke u bërë një nga vendet me çmimim më të lartë në Evropë.
“Jemi vendi i katërt sipas raporteve ku pjesa më e madhe shkon për energjinë. Këtu pyetja është çfarë u bë me reformën e energjisë? Ne e dimë se këto para nuk shkuan kurrë në destinacion, e dimë se karburanti shqiptar u shtrenjtua. Një nga vendet me çmimin më të lartë në Europë. Kjo është një tjetër pasojë e keqqeverisjes së tij, e vendimmarrjes së tij”.
Ndër të tjera, kryedemokrati fajëson Ramën se paratë nuk i ka investuar për uljen e çmimit të energjisë, por për të pasuruar një grup oligarkësh.
“Paratë që duhet të çonte për të ulur çmimin e energjisë, i ka marrë dhe i ka cuar vetëm për të pasuruar një grup oligarkësh. Përballë kësaj ne kemi jo thjesht dhe vetëm propozimet që u bënë publike dje, por do bëjmë gjithçka për të ndalur këtë fatkeqësi të re, këtë sëpatë që po mpreh për qafën e holluar të shqiptarëve”.
Për liderin e opozitës zgjidhja për daljen nga situata energjitike është plani i PD me shtatë pika.
