Në mesazhin drejtuar shqiptarëve lidhur me krizën energjetike, kryeministri Rama tha se edhe Shqipëria si të gjitha vendet e tjera, është e përfshirë dhe e detyruar që të përballet me këtë furtunë globale.
Gjatë fjalës së tij, Rama tha se është përgjegjësia e qeverisë që të mbrojë nga goditja e kësaj fatkeqësie të re shtresat më në nevojë, konsumatorët familjarë, si edhe biznesin e vogël.
“Duam apo nuk duam Shqipëria është e detyruar që të përballet me këtë furtunë globale. Beteja kulmore do të zhvillohet deri në fund të gjashtëmujorit të parë të vitit të ardhshëm. Detyra jonë është të mbrojmë shtresat më në nevojë, konsumatorët familjarë dhe biznesin e vogël. Siç ia dolëm me tërmetin dhe pandeminë do t’ia dalim dhe me energjinë. Pavarësisht vullnetit tonë, këto vitet e fundit u bënë si ajo fjala nga lufta dolëm dhe në luftë do të shkojmë. Asnjë frikë, asnjë pasiguri, vetëm besim se më e mira do të bëhet se Shqipëria do të synojë majat në këtë dekadë të re që sapo kemi hyrë”, u shpreh kryeministri.
Rama tha se në të gjithë botën po ndihen tashmë efektet e rritjes së çmimit të gazit dhe karburantëve, dhe Shqipëria nuk mund t’iu shpëtojë këtyre pasojave. Kryeministri kërkoi besim dhe durim nga qytetarët, ndërsa bëri një pasqyrë të situatës së deritanishme.
