Nënkryetari i Lëvizjes Socialiste për Integrim, Petrit Vasili ka reaguar për krizën energjetike të paralajmëruar nga kryeministri Edi Rama, nëpërmjet një analize në “Facebook”.
Vasili e konsideron këtë situatë një mashtrim të radhës kryeministrit, duke theksuar se ai foli për kataklizëm energjie,- “foli e tha që çmimet jo vetëm do të rriten, por nuk do të ulen edhe kur kriza të ketë mbaruar”, shprehet Vasili.
Nënkryetari i LSI-së më tej thekson se deklarata e Ramës ishte një grackë e re për të mbushur arkën e boshatisur të pushtetit me gjakun dhe sakrificat e shqiptarëve, ndërsa shton se në këtë moment të shpërdorimit të detyrës sipas tij nga Rama, SPAK duhet të hetojë.
“Përse SPAK-u ka taposur gojën? Përse SPAK-u mbyll sytë dhe nuk heton qeverinë OSHE dhe KESH për shpërdorimin e tmerrshëm me paratë publike dhe demin kolosal? Përse SPAK- nuk heton kryeministrin që shpërdoron pushtetin për deklaratat destabilizuese për gjoja krizë duke tronditur shqiptarët?
Edhe sa kohë SPAK- u do vazhdojë të funksionoje me regji? Edhe sa kohë SPAK- u do vazhdojë ekskursionet nga Lushnja, Pogradeci, cironkat e deri tek RTSH, por pa u ndalur kurrë te qeveria? Kjo krizë e stisur nga Rama kërkon ndëshkim shumë të rreptë nga drejtësia”, shkruan më tej Vasili.
Ndërsa e mbyll postimin e tij me një pyetje që lë vend për diskutim dhe përforcon më shumë objektivin e shkrimit të mësipërm. “Atëherë ç’dreq drejtësie është kjo??”, ka përfunduar ai.
