Të vazhdojë të mbështetet te Leo Messi për Barcelonën është një bekim i madh nga ana sportive, por akoma më shumë edhe nga ana ekonomike. Qëndrimi i kapitenit përkthehet me shumë para për Barcelonën.
Imazhi i tij është një nga më të mëdhenjtë e futbollit dhe është një garanci e madhe për Barcelonën për të afruar sponsorë të rinj dhe rritur të ardhurat e klubit, me qëllim pagimin e më shumë se 600 milionë eurove borxhe.
Turizmi në Spanjë po i kthehet normalitetit dhe Barcelona pritet të ketë shumë më shumë njerëz në dyqanet e saj zyrtare dhe në muzeun e klubit, një pasuri më vete. Ndërkohë, sponsorët e Barçës kanë firmosur kontrata me dijeninë se kontrata e Messit skadon këtë verë.
Tashmë që është e sigurt se ai do qëndrojë, Barça do ketë mundësinë të rishikojë kontratat dhe të pranojë sponsorë të rinj me fitime shumë më të mëdha. Messi është një nga shtigjet e duhura për të dalë nga kriza, duke parë që shitja e yjeve është më shumë se e vështirë.
