Kronologjia/ Salianji: Burgosja, plani i Ramës dhe marionetave të tij socialiste në drejtësi për të goditur opozitën

Deputeti demokrat Ervin Salianji, në një konferencë për mediat këtë të premte, një ditë pas dënimit që i dha Gjykata e Apelit, risolli në kujtesë planin se si u përgatit burgosja e tij politike, vetëm sepse ai denoncoi vëllanë trafikant të ish-ministrit të Brendshëm, Fatmir Xhafaj.

Salianji theksoi se është “i burgosur politik me urdhër të Ramës dhe Xhafajt”.

Ai ngriti pyetjen se pse Edi Rama u detyrua dje të komentonte një vendim gjyqësor, teksa më herët ka përsëritur se nuk komenton vendimet e gjykata.

Salianji risolli në vëmendje denoncimin e bërë nga ai nga selia blu më 15 mars 2018, se vëllai i Xhafajt, i dënuar me 7 vite e muaj burgim nga Italia, fshihen në Shqipëri dhe vijonte ende aktivitetin kriminal të trafikut të drogës.

Pas publikimit të denoncimit duke iu referuar dokumenteve zyrtare të autoriteteve italiane dhe audio-përgjimit ku implikohej Geron Xhafaj, deputeti kujtoi se Rama dhe xhafaj s’kishte asnjë reagim për këtë dhe as për deklaratat e tjera të PD që kërkonin përgjegjësi.

“Pasi e bënë gjithë projektin se si do montohej çështja dolën në reagim publik”, theksoi deputeti.

Salianji kujtoi se denoncimi i tij publik çoi në ekstradimin e Geron Xhafajt drejt Italisë dhe solli shkarkimin e të vëllait si Ministër i Brendshëm.

“Këtë Fatmir Xhafaj u betua se nuk do ma falte. Denoncimi im me fakte, që gjykata e quan “kallzim të rremë” i ndërpreu Xhafajt karrierën politike. Edi Rama dhe Fatmri Xhafaj kërkojnë të bëjnë të njëjtën gjë, si shpagim kundër meje dhe opozitës, për atë denoncim dhe qindra të tjerë, që provuan se ata nuk janë funksionarë shteti por pupacë narkoshteti”, shtoi Salianji.

Ai vuri në duke se burgosja e tij është një goditje ndaj opozitës dhe një mekanizëm për të penguar aktivizimin e tij në zgjedhjet e vitit 2025.

Deputeti u bëri apel qytetarëve dhe demokratëve që të bashkohen në protestën e thirrur nga opozita më 6 Tetor: “Në 6 tetor në Tiranë të jemi bashkë, të mblidhemi të fortë për të shuar e mbytur gëzimin e lig se ata po e shfarosin Partine Demokratike, se po shfarosin e syrgjynosin demokratët, nuk e bëjnë dot”.

Deputeti u shfaq i qetë gjatë konferencës për mediat, ku lexoi edhe kërkesën drejtuar SPAK për të hetuar vëllezërit Xhafaj në kuadër të ligjit antimafia. Iu përgjigj pyetjeve të gazetarëve, si edhe premtoi se vendimi i djeshëm ishte vetëm një betejë, por lufta do të përfundojë me një rezultat tjetër.