Policia e Krujës, pas marrjes së njoftimit mesditën e sotme, nga urgjenca e Spitalit të Krujës, se dy ditët e fundit kanë shkuar për ndihmë mjekësore, rreth 170 persona, të cilët dyshohet se janë helmuar, menjëherë ka ngritur grupin hetimor, i cili ka shkuar në spitalin e Krujës dhe vijon punën për sqarimin e rrethanave dhe zbardhjen e shkakut.
Nga ana e Policisë janë njoftuar organet e shëndetit publik dhe të AKU-së, për të sqaruar këtë situatë. Priten analizat nga DSHP Krujë dhe Tiranë.
Grupi hetimor po kryen të gjitha veprimet procedurale, me qëllim zbardhjen e shkakut dhe sqarimin e rrethanave të këtyre rasteve.
Helmimi i 170 personave në Krujë, flet drejtoresha e spitalit: Nuk dimë nëse është nga uji apo ushqimi
Për rastin e helmimit në qytetin e Krujës ka reaguar drejtoresha e spitalit në këtë qytet. Në një prononcim për mediat, ajo ka konfirmuar rastin dhe është shprehur se personat kanë marrë mjekimin dhe janë larguar.
Drejtoresha gjithashtu ka thënë se ka raste të shtuara sa i përket pacientëve që kanë kërkuar ndihmë mjekësore për shkak të helmimit dhe që nuk dihet se nga çfarë janë helmuar.
“Gjatë ditës së sotme në urgjence janë paraqitur rreth 20-30 persona me shenja të intoksikimit. Kanë marrë mjekim në urgjence dhe janë larguar, pra nuk është asnjë i shtruar në spital. Nuk mund të them se kemi të bëjmë me helmim masiv sepse spitali mbulon 15 mijë banorë. Por mund të them se ka raste të shtuara të pacientëve që kanë kërkuar ndihmë mjekësore për shkak të helmimit. Nuk dimë nëse është nga uji apo ushqimi kemi kërkuar të bëhen analiza nga Njësia e Kujdesit Shëndetësor” – është shprehur drejtoresha.
Kujtojmë se 170 persona janë paraqitur me shenja helmimi ditën e sotme në Krujë. Dyshimet janë se ata janë helmuar nga uji, ndërsa akoma nuk ka një komunikatë zyrtare.
Krujë, 170 persona paraqiten në spital, dyshohet se u helmuan nga uji
170 persona janë paraqitur me shenja helmimi ditën e sotme në Krujë. Dyshimet janë se ata janë helmuar nga uji, ndërsa akoma nuk ka një komunikatë zyrtare.
Mësohet se këta personat kanë marrë ndihmën e parë në spital nga mjekët dhe më pas janë lënë të lirë për të shkuar në shtëpi.
Autoritetet gjithashtu janë duke kryer analizat e nevojshme të ujit për të zbuluar nëse helmimi ka ardhur nga aty.
