Me dhjetëra qytetare krutane janë mbledhur para bashkisë Krujë ku po protestojnë për ujin e pijshëm i cili u bë shkak i helmimit të mbi 600 personave. Banoret deklarojnë se tubat dhe impianti i ujësjellësit janë tuba nafte të përdorura të mara në Ballsh dhe janë montuar këtu për ujësjellësin e qytetit.
“Kanë përdorur tubat e kromit të marra në Bulqizë për ujësjellësin tonë. Kanë qenë tuba të përdorur më parë.I gjithë qyteti i Krujës e di që ato janë tuba nafte. Prandaj kërkojmë që të marrë masa shteti dhe të verifikojë këto. Jemi të sigurt që ato tuba janë për impiant naftë, i kanë marrë si për më lirë ata dhe paratë i kanë futur në xhep. Jemi të sigurt për këtë sepse kur erdhi uji nga ujësjellësi i ri ishte ngjyrë kaf, prandaj e bllokuan për një farë kohe”, u shprehën ata.
Ata thanë se çështje nuk do të mbarojë me kaq, po të jetë nevoja do përshkallëzojnë protestat derisa të kruhet hetim i denjë për të gjithë procesin e ujësjellësit. “Jemi të gjithë të sëmurë, se jemi të helmuar nga uji. Është krim njerëzor. Na ndruan linjën për përfitime të tyre. Që kur u ndërrua linja filloi problemi. Ne nuk do e lëmë me kaq do kërkojmë hetim dhe të drejtën tonë”, tha një banore.
Kujtojmë se, pak ditë më parë me qindra banorë të Krujës janë paraqitur në spital për shkak se ishin helmuar nga uji. Deri më tani regjistrohen mbi 600 banorë të helmuar dhe ata fajësojnë qeverinë se rrezikoi shëndetin e tyre, në vend që t’u siguronte ujë të pijshëm.
