Kryebashkiaku i Kievit, Vitali Klitschko, në një intervistë për BBC-në, ka deklaruar se Ukraina mund të detyrohet të bëjë lëshime territoriale si pjesë e një marrëveshjeje për paqe me Rusinë, përballë një trysnie në rritje, veçanërisht nga presidenti amerikan Donald Trump, që sugjeron pranimin e një zgjidhjeje kompromisi.
“Një nga opsionet është dorëzimi i një pjese të territorit. Nuk është një zgjidhje e drejtë. Por për hir të paqes, ndoshta si një zgjidhje e përkohshme, mund të merret në konsideratë,” u shpreh Klitschko.
Megjithatë, ish-kampioni i botës në boks, sot politikan 53-vjeçar, nënvizoi se qytetarët ukrainas nuk do ta pranojnë kurrë pushtimin rus si legjitim. Deklarata e tij erdhi pak pas një sulmi të ashpër me raketa dhe dronë mbi kryeqytetin ukrainas, ku humbën jetën 12 persona dhe mbi 80 të tjerë u plagosën — një nga sulmet më të rënda të muajve të fundit në Kiev.
Rusia, që nisi pushtimin e Ukrainës në vitin 2022, vazhdon të mbajë nën kontroll rreth 20% të territorit të shtetit ukrainas.
Discussion about this post