Kryemadhi për Ballukun: Flitet që është garipe dhe duket se nuk e rruan fare për “palloshin” -

Ish-kryetarja e LSI-së, Monika Kryemadhi, ka komentuar zëvendëskryeministren Belinda Balluku, duke thënë se ajo ka “namin që është garipe dhe bobe”. Sipas Kryemadhit, mesazhet e Ballukut tregojnë se ajo i bindet urdhrave të Ramës. Ajo deklaroi se tenderi për të cilin flitet ishte përgatitur në rregull, por më pas u ndryshua me urdhër nga “lart” dhe u zbatuar sipas udhëzimeve të asaj që Kryemadhi e quajti “palloshi i gjatë”.

Kryemadhi, e ftuar në ‘Kjo javë’ në News24 theksoi se Balluku i ka qëndruar besnike kryeministrit Edi Rama. “Zonja balluku e ka namin që është garipe dhe është bobe. Me mesazhet që shkruante, është. Nuk e rruan fare për asnjë, atij tjetrit i thotë pallosh i gjatë dhe e ka në dorë. Nga mesazhet doli që i ka që e ka bërë tenderin në rregull, por e ka ndryshuar me urdhër nga lart dhe e ka zbatuar urdhrin e “palloshit të gjatë”.

I ka qëndruar besnike Ramës. Rama në kal, unë në kal, Rama në tokë, unë në tokë. Mënyra për ta anuluar tenderin është ndërhyrje që i është kërkuar Ramës”, tha ajo.

Ajo ka komentuar situatën aktuale të opozitës në Shqipëri, duke dhënë edhe një këshillë për kreun e PD, Sali Berisha.

Kryemadhi theksoi se opozita ka nevojë për “zemër” dhe për përkushtim të vërtetë ndaj qytetarëve, duke kritikuar politikanët që, sipas saj, mendojnë më shumë për përfitime sesa për ndryshim politik.

“Opozita do zemër. Nëse opozita mendon si të marrë leje ndërtimi, si të marrë tendera, si t’i zërë vendin Sali Berishës, atëherë nuk do vijë kurrë opozita në pushtet,” u shpreh Kryemadhi.

Ajo shtoi se Berisha duhet të shmangë gabimet që, sipas saj, kanë bërë edhe ajo vetë dhe Ilir Meta, duke u izoluar në “rrethin e miqve”.

“Berisha, për mendimin tim, duhet të dalë jashtë rrethit. Nuk duhet të bëjë gabimin e Ilir Metës dhe timin, që u izoluam në rrethin e miqve tanë. Opozita duhet të dalë jashtë rrethit të miqve,” theksoi ish-deputetja.

Kryemadhi kritikoi gjithashtu pasivitetin e disa figurave opozitare, duke theksuar se mbështetja për Berishën në momentet e vështira ishte e kufizuar.

“Miqtë të përdorin: kur prodhon pushtet japin jetën për ty, por kur ishte Berisha në arrest shtëpie i mblidheshin vetëm 50 veta poshtë dritares. Ata që nuk dalin në terren, japin një deklaratë në televizion dhe nuk bëjnë asgjë,” deklaroi ajo.

Në përfundim, Kryemadhi i bëri thirrje Berishës të rishikojë rrethin e bashkëpunëtorëve dhe të analizojë listat e kandidatëve të përzgjedhur në zgjedhjet e fundit.

Gjatë intervistës, Kryemadhi vlerësoi ish-kryeministrin Sali Berisha si të vetmin që po bën opozitë reale në Shqipëri, duke theksuar se ai po e bën këtë përballë vështirësive të mëdha personale dhe familjare.

“Sali Berisha është i vetmi që bën opozitë dhe e shoh që është vetëm fare, sado të mundohen të tjerë. Edhe ai ka marrë kosto familjare për këtë,” deklaroi Kryemadhi.

Duke folur për situatën e Ilir Metës, ajo u shpreh se dalja e tij nga burgu do të sillte një “rigjenerim politik” dhe do të rikthente një rol aktiv për të në arenën politike.

“Duke dalë Ilir Meta nga burgu bëhet një rigjenerim tjetër. Nëse Meta del nga burgu, mendoj se do i rikthehet zanatit si kingmaker,” u shpreh ajo, duke nënvizuar ndikimin që Meta mund të ketë në ekuilibrat e opozitës.

Sipas saj, arrestimi i Metës ka ndërprerë komunikimin e Partisë së Lirisë me bazën e saj, duke dobësuar ndjeshëm strukturat e brendshme.

“Nëse del Ilir Meta, krijon një këndvështrim tjetër, sepse arrestimi i tij ka ndërprerë komunikimin me bazën në Partinë e Lirisë, e cila funksionon në marrëdhëniet me njerëzit,” shtoi ish-deputetja

Etiketa: Monika Kryemadhi