Kryemadhi: SPAK të arrestojë sekretarin e Ramës për inceneratorët, abuzoi me detyrën

Kryetarja e Lëvizjes Socialiste për Integrim Monika Kryemadhi ka postuar një video në rrjete sociale ku flet sërish për arrestimin e ish-ministrit të Mjedisit, Lefter Koka dhe skandalit me aferat korruptive të inceneratorëve. Kryemadhi shprehet se sekretari i Përgjithshëm i kryeministrit, Ëngjëll Agaçi duhet arrestuar nga SPAK, duke e konsideruar atë si një nga aktorët kryesorë në aferën e inceneratorëve në Elbasan.

“Pse SPAK vonon arrestimin e Ëngjëll Agaçit? Sekretari i Përgjithshëm i kryeministrit Ëngjëll Agaçi është një nga aktorët kryesor në aferën e inceneratorit të Elbasanit. Agaçi, megjithëse haset me refuzimin e Agjencisë së Prokurimit Publik për procedurën për inceneratorin e Elbasanit me vetëdije të plotë shkel ligjin. Ligji, e përcakton qartë që Sekretari i Përgjithshëm i kryeministrit është përgjegjës për hartimin e rendit të ditës së mbledhjes së Këshillit të Ministrave”, shprehet Kryemadhi.

Kryetarja e LSI-së akuzon sekretarin e Përgjithshëm të kryeministrit se ka shfrytëzuar detyrën dhe fut në rendin e ditës të mbledhjes së Këshillit të Ministrave procedurën “negocim pa shpallje”, ndonëse është i vetdijshëm se kjo procedurë ndalohet nga APP.

“Duke shfrytëzuar këtë komptencë, Ëngjëll Agaçi pasi është në dijeni nga APP e cila kundërshton procedurën e ndjekur ‘Negocim pa shpallje’ e fut në rendin e ditës së Këshillit të Ministrave, jo lidhjen e kontratës por faturën financiare të kontratës. Pra, miratohet fatura financiare pa u vënë në dijeni të kushteve financiare të saj” shton Kryemadhi.

Kryemadhi përfundon fjalën e saj duke thënë se Agaçi duhej të ishte para drejtësisë për aferën e inceneratorëve, pasi miratimi i kontratave koncesionare ka buruar nga një procedurë e paligjshme.

Për këtë shkelje, jo vetëm në inceneratorin e Elbasanit por dhe atë të Tiranës Ëngjëll Agaçi duhet të ishte para drejtësisë.Pra, miratohet me VKM financimi i nje kontrate që buron nga një procedurë e paligjshme e provuar me shkresë dhe paralajmërim zyrtar nga Agjencia e Prokurimit Publik”, thuhet ne video.