Tashmë nuk ka asnjë rezervë se mes 2 partive më të mëdha të opozitës PD dhe LSI ka një luftë të hapur. E gjitha nisi pas një deklarate të fortë nga sekretari i Përgjithshëm i PD-së, Gazmend Bardhi, i cili tha se para zgjedhjeve të 25 prillit i ishin ofruar LSI-së 15 deputetë të sigurt në një listë të përbashkët, por ajo refuzoi sepse parashikonte të fitonte e vetme 34.
Por kjo deklaratë pasoi me reagime dhe akuza të forta nga LSI. Sot, Basha në një intervistë për Zërin e Amerikës e kaloi fajin tek politikani Ilir Meta, jo tek institucioni i Presidentit, duke pretenduar se ishte ai që shkatërroi fushatën e LSI-së me qëndrimet e tij në 2 javët e fundit të saj.
“Ka qenë Ilir Meta pjesë, personi Ilir Meta, i cili nëse më pyesni, dy javët e fundit të fushatës ka qenë aseti më i madh i Edi Ramës, shkatërruesi i fushatës në bindjen time, të LSI-së në veçanti në disa zona elektorale nga Vlora në Elbasan dhe në veçanti në javët e fundit me qëndrimet e tij, ka çuar ujë tek mulliri i Edi Ramës” – tha Basha.
Kaq ka mjaftuar për të nxitur një reagim nga nënkryetari i Lëvizjes Socialiste për Integrim, Petrit Vasili ka bërë një shkrim të gjatë në Facebook ku e quan Bashën krye-gënjeshtar dhe krye-mashtrues. Po ashtu, Vasili tha se Basha kishte prerë në besë madje se u koordinua me kryeministrin Edi Rama për të dëmtuar LSI me çdo formë e çdo mënyrë.
“Kryemashtruesi nuk pranoi as të regjistrohej për pjesëmarrje në zgjedhje lokale në 18 tetor 2019, sipas dekretit të shtyrjes së zgjedhjeve nga Presidenti Meta, sepse ishte ne kulm të pazarit me Edi Ramën dhe preu në besë LSI-në, opozitën dhe Presidentin. Mashtruesi ra dakord për fushatë të përbashkët me LSI-në në 25 prill në të gjithë qarqet e vendit. Por mashtruesi pengoi, refuzoi, u shmang dhe nuk bëri as edhe një takim të vetëm, bile me urdhër të Edi Ramës nuk mori pjesë as në mitingun e mbylljes së fushatës së LSI-së. Mashtruesi i këshilluar nga kompania izraelite, që i dha Edi Rama koordinoi me izraelitët e Ramës për të dëmtuar LSI-në me çdo formë e çdo mënyrë. 108 mijë votat e LSI janë të gjitha grushte në surrat për kryemashtruesin ordiner, që kishte bërë plan t’i asgjësonte së bashku me binjakun e tij Edi Rama”-shkruan Vasili.
Discussion about this post