Kryeministri Edi Rama ka reaguar sërish lidhur me protestat kundër projektit në Zvërnec, duke drejtuar kritika jo vetëm ndaj organizatorëve të tubimeve, por edhe ndaj eurodeputetëve që morën pjesë në protestat e zhvilluara në Tiranë.
Gjatë një deklarate publike, Rama tha se Shqipëria nuk mund të realizojë projekte që bien ndesh me standardet e Bashkimit Evropian, duke theksuar se çdo zhvillim duhet të jetë në përputhje me kërkesat e Komisionit Evropian.
Megjithatë, ai ironizoi pjesëmarrjen e disa eurodeputetëve në protestë, duke deklaruar se “3-4 eurodeputetë erdhën këtu dhe flisnin përçart”.
Sipas kryeministrit, projekti për zonën e Zvërnecit është ende në fazën e zhvillimit dhe është hartuar me përfshirjen e disa prej arkitektëve më të njohur në botë.
Rama kritikoi kundërshtarët e projektit, duke thënë se po sulmohet një ide që ende nuk është realizuar dhe se vlerësimi duhet të bëhet pasi projekti të marrë formën përfundimtare.
“Për këtë projekt janë mbledhur disa nga arkitektët më të mirë të botës. Të dalësh dhe të sulmosh një projekt që akoma nuk është bërë është inkuizicion”, u shpreh Rama.
Ai shtoi se Shqipëria nuk mund të ndërmarrë një projekt që nuk do të pranohej nga Bashkimi Evropian, duke theksuar se me këtë nënkupton qëndrimet dhe kriteret e Komisionit Evropian.
“Le t’i lëmë të gjitha këto, në fund fare një gjë është e sigurtë, ne nuk bëjmë dot një projekt që nuk e pranon BE, nuk e bëjmë dot, ose duhet të themi që nuk futemi në BE.
Kaq e thjeshtë është historia. Kur them Bashkim Europian, unë flas për Komisionin Europian, nuk flas për ato 3-4 të gjelbrat që erdhën këtu dhe flisnin përçart”, tha Rama.
Discussion about this post