Në mbledhjen e përbashkët të dy qeverive Shqipëri-Kosovë, ministrja e Infrastrukturës, Belinda Balluku tregoi më shumë detaje nga marrëveshja që u nënshkrua për ndërtimin e linjës hekurudhore Durrës-Prishtinë.
Pasi deklaroi përfitimet e kësaj marrëveshjeje, Balluku tha në fund të fjalimit të saj, se nuk do zgjatej shumë pasi kryeministri Rama nuk i ka qejf fjalimet e gjata, për t’ia lënë këtij të fundit fjalën.
“Hekurudhat janë mënyra e transportit më eficente. Ajo ç’ka është më e rëndësishme është nxitja dhe rritja e volumeve të tregtisë që do të ketë mes dy vendeve tona. Përmend Porto Romanon që tashmë ka nisur, është më modernja në zonën e Mesdheut jo vetëm në Ballkan. Kosova është vendi me të cilin Shqipëria ka pasur rritjen më të madhe të eksportit të mallrave në krahasim me vitin 2020. Ndërkohë 20% e mallrave, në Porto Romano kanë destinacion Kosovën dhe 35% e mallrave që vijnë nga Durrësi vijnë nga Kosova. Do të ndaloj dhe në një projekt tjetër, porti ekzistues i Durrësit që kthehet në një nga marinat më të mëdha në Mesdhe. Do të jetë një pol i turizmit që nuk do të jetë vetëm për Shqipërinë, por edhe për Kosovën. Nuk do të zgjatem shumë sepse kryeministri im nuk i ka qejf fjalët e gjata, por ne jemi besimplotë se dhe ky projekt i përbashkët do të ecë me ritme të plota”, tha Balluku.
Në mbledhjen e sotme u nënshkruan një sërë marrëveshjesh për lehtësimin e kalimit në pikat kufitare, lëvizjen e mallrave dhe shërbimeve, arsimin dhe bujqësinë.
Discussion about this post