Kryeministrja serbe: Serbët do të fitojnë, Kurti do të dështojë

Kryeministrja serbe, Ana Brnabic i kundërpërgjigjet presidentes së Kosovës Vjosa Osmani në Twitter.

Në një replikë ndaj statusit të Osmanit, kryeministrja serbe ironizon se është plotësisht dakord me të, por thekson se serbët po mbrojnë të drejtat e tyre dhe do të fitojnë, ndërsa Kurti, sipas saj do të dështojë.

“Së fundi (!), jam plotësisht dakord me znj. Osmani: demokracia dhe shteti i së drejtës do të mbizotërojnë. Prandaj janë barrikadat. Serbët po mbrojnë të drejtën e tyre për të votuar (të cilën ju e hoqët), të drejtën për një gjykim të drejtë (të cilën ju e keni mohuar) dhe Marrëveshjen e Brukselit. Ata do të triumfojnë dhe Kurti do të dështojë”, shkruan Brnabic.

Reagimi i Osmanit

Më herët, Osmani shkroi në Twitter:

“Sulmet ndaj gazetarëve që raportojnë nga veriu i Kosovës, nga bandat kriminale të mbështetura nga Vuçiç, tregojnë qëllimet e vërteta të Beogradit për të fshehur të vërtetën. Udhëheqja e Serbisë mund të ketë ndryshuar që nga vitet ’90, por qëllimet e tyre nuk kanë ndryshuar. Ata do të dështojnë. Demokracia dhe shteti i së drejtës do të mbizotërojnë”.