Kryetari i PD, Lulzim Basha, me anë të një postimi në Facebook, ka përkujtuar në 75-vjetorin e Postribës kryengritjen e parë antikomuniste në Shqipëri.
Basha thotë se Postribura hyri kryelartë në histori si lëvizja e parë antikomuniste në Europë.
Ai shprehet se tashmë një hije tjetër po vjen në Shqipëri në formën e një regjimi që ka qëllim të njëjtë me atë të së shkuarës, po pengon integrimin europianë të vendit.
“Një hije, e cila vjen prej një regjimi që ka mjete të ndryshme por qëllime të njëjta me atë të së shkuarës, po e pengon vendin tonë të jetë pjesë e familjes europiane. Një regjim që godet demokracinë, lirinë dhe të drejtat e qytetarëve, i cili është sa produkt i forcave të errëta të shoqërisë, aq edhe produkt i përballjes të pamjaftueshme me të kaluarën, që u lejoi pasardhësve të xhelatëve të hedhin pluhur mbi historinë e të restaurojnë një model që e kthen pas Shqipërinë.”
Basha shton se kryengritja e Postribës është thirrje patriotike për rezistencë dhe për t’u përballur me çdo regjim që tenton të pengojë aspiratën e popullit shqiptar për liri e demokraci.
“Kjo përpjekje tinëzare, që shkon në kundërshtim me idealet e martirëve të Postribës dhe po ashtu me aspiratën e shumicës dërrmuese të shqiptarëve për një Shqipëri europiane, është një thirrje patriotike për rezistencë, për t’u përballur, për të mos lejuar asnjë regjim të pengojë aspiratën e një populli të tërë për të gëzuar të njëjtën liri, të njëjtën demokraci, të njëjtën mirëqenie që gëzojnë popujt e Bashkimit Europian.”- përfundon Basha shkrimin e tij në Facebook.
