Pak më parë kryeplaku i fshatit Rinas ka shkuar sot në protestë dhe iu ka thënë banorëve se ka arritur në një marrëveshje me ARRSH që, nga nesër rruga për në aeroport të jetë plotësisht e hapur. Por, banorët nuk e besojnë këtë garanci të tij, ndaj vazhdojnë të kërkojnë me ngulm hapjen sa më parë të rrugës pasi po i pengon në aktivitet e tyre të përditshme.
Ata theksojnë se ky vendim prek të gjitha aspektet e jetës së tyre, nga dërgimi i fëmijëve në shkollë, aksesi për në tokat e mbjella për t’i punuar apo deri tek problemet shëndetësore e rastet e vdekjeve. Për të dalë nga fshati, sipas tyre kthimi është shumë i vështirë me devijimin e bërë, pasi duhet të përshkojnë shumë kilometra deri në Vorë që të mund të hyjnë sërish në fshat.
“E sot jemi këtu prapa nëse e realizojmë nesër deri në 6 të mëngjesit mirë, nëse jo, ne këtu do jemi prapë. Fëmijët duhet 30 kilometra me i sjell për në shkollë. Kështu është gjithë fshati. Deri në 12 do jemi këtu, pastaj të shohim si do reagojnë se mund të ketë dhe probleme më të mëdha që nuk i parashikojmë dot ne”. Jam këtu për lirimin e rrugës na kanë bllokuar krejt. Duhet me bo rrethrrotullimit 24 km për 3 km. Jemi banorë që lëvizim, duhet të bëj 24 km që të vij në aeroport”, shprehen protestuesit.
Ndërkohë kryeplaku i fshatit u ka dhënë një garanci se në mënyrë konfidenciale ka marrë një përgjigje nga autoritetet se qarkullimi për banorët e fshatit do të lejohet deri tek Rrethrrotullimi i “Nënë Terezës”.
Discussion about this post