Të mërkurën kryeprokurori i Vlorës, Aurel Zarka, u fut në sallën nr.1 të Gjykatës së Posaçme, jo si prokuror, por si person i dyshuar për “korrupsion” dhe “ushtrim të ndikimit të paligjshëm”.
Gjykata e Posaçme konfirmoi “arrestin në burg” caktuar në mungesë ndaj tij, ndërsa pak orë para gjyqit KLP e pezulloi edhe nga detyra.
Për seancën e zhvilluar me dyer të mbyllura, ku kryeprokurori mbajti qëndrim mohues për akuzat, gjykata kërkoi ruajte sekreti për çdo detaj të akteve të hetimit, duke kujtuar se në të kundërt, përgjegjësit do hetoheshin për “zbulim të akteve apo të dhënave sekrete”.
Sipas SPAK, kryeprokurori i Vlorës, Zarka dhe tre të persona të tjerë, të shpallur në kërkim, mes të cilëve një ish-hetuese e një avokat kanë ushtruar ndikim të paligjshëm, si edhe dhënë e marrë ryshfet të funksionarë të drejtësisë.
Struktura e Posaçme njoftoi zyrtarisht se ata kanë ndërhyrë në 4 raste për dosjen “Toyota Yaris” të 3.4milionë eurove të gjetura në një mjet të ardhura nga Belgjika, dosje që nisi për “grup kriminal” e “pastrim parash” nga ish-Prokuroria për Krimet e Rënda, por përfundoi me vetëm një të dënuar me 1 vite e 6 muaj burg nga gjykata e zakonshme.
Po sipas SPAK, të dyshuarit kanë ndikuar në hetimin pasuror nga SPAK ndaj Suelçelës, në një çështje për vjedhje dhe dy për “kultivim narkotikësh”.
Hetimi i SPAK është i hapur dhe shtrirë tek funksionarët e drejtësisë që kanë pasur në duar këto çështje.
Discussion about this post