Në prani të kryeministrit Rama, kryetari i Bashkisë së Tiranës, Erion Veliaj prezantoi për publikun një destinacion të ri të kohës së lirë për fëmijët e kryeqytetit: Zoo Park Tirana, apo kopshti zoologjik i transformuar. Zoo Park ofrohet kësisoj si një mundësi shtesë për shkollat e Tiranës për të zhvilluar vizita në terren në kuadër të programeve mësimore të lëndëve të shkencave natyrore.
Nëse Tirana do të kishte më shumë mundësi të tilla, edhe më mirë do të bëhej për nxënësit kryeqytetas që t’i shpëtojnë kurthit të nxënies përmendësh të dijeve pa implikime praktike dhe pa metoda alternative për të përvetësuar të rejat shkencore që gjejnë në literaturën shkollore. Deri këtu, shumë mirë.
Por kur kthen sytë nga shkollat, kopshtet dhe çerdhet e kryeqytetit e kupton se ky është një operacion propagandistik që përpiqet të mbulojë jo vetëm gjendjen e mjeruar të institucioneve të mësimit në Tiranë, por paralelisht maskon interesat ekonomike të ndërtuesve që përfitojnë nga zaptimi i territoreve të gjelbërta të Tiranës. Një rast i tillë është masakra që po ndodh tek Kopshti Botanik ku qyteti po humbet jo vetëm një copë mushkërie, por edhe një mundësi për të zgjeruar Kopshtin ekzistues që mund të bëhej një përplotësues i mirë për edukimin, jetën kulturore dhe turistike të qytetit.
Për t’u kthyer tek institucionet arsimore në Tiranë, gjendja e tyre nuk i ngjan aspak një kryeqyteti europian, e aq më pak një Kryeqyteti Botëror të Rinisë. Shkollat e Tiranës janë shkolla me turne, shkolla pa ujë, shkollat pa banjo, shkolla me banjo të qelbura dhe burim epidemish, shkolla pa ngrohje, shkolla pa oborr, shkolla pa hapësira sportive, shkolla pa laboratore. Këto janë të gjitha nota ngelëse të Bashkisë së Tiranës që ka dështuar plotësisht me funksionin e saj arsimor.
Kopshtet dhe çerdhet e Tiranës janë ku thërret qameti. Të amortizuar, pa ngrohje, pa mjete mësimore, pa furnizime higjieno-sanitare, të mbingarkuara, këto qendra komunitare nuk ofrojnë minimumin e shërbimit të kujdesit dhe edukimit të fëmijëve të kryeqytetit. Ushqimi i ofruar në këto institucione është skandaloz. Fëmijët ushqehen sipas një menyje të denjë për mensat ditore të të varfërve. Si mund të ushqehet një 3 vjeçar me fasule për drekë? Si mund të ushqehet një 2-vjeçar me tarhana apo me tërshërë në mëngjes?
Siç kuptohet, Bashkia e Tiranës i shikon të gjithë këto zëra të buxhetit si mundësi përfitimi. Buka e ofruar në kopshtet dhe çerdhet e Tiranës është më së paku e pjekur një ditë më parë. Çuditërisht, një bukë e tillë kushton në faturat e Bashkisë 20 deri në 30% më shtrenjt se buka e ngrohtë, edhe pse furnizimi bëhet me shumicë dhe do të duhej të ndodhte e kundërta. Megjithatë, mediat nuk flasin dot për këto tema të ndjeshme dhe histori të pastra korrupsioni sepse redaksitë e tyre komandohen drejtpërdrejt nga zyra e propagandës e Erion Veliajt me lejet e ndërtimit, me tenderat dhe favoret që shpërndan Bashkia e Tiranës për pronarët e tyre.
Studimet e Bankës Botërore provojnë se lidhja ndërmjet dietës e kushteve të mësimit dhe performancës së nxënësve në të gjitha disiplinat është e fortë. Fëmijët që kequshqehen, që ulen për orë të tëra në klasat e ftohta për disa muaj rresht nuk mund të shkëlqejnë dhe nuk do të shtojnë ndonjë vlerë në tregun e punës nesër.
Fëmijët e kequshqyer të Tiranës, në klasat e mbingarkuara dhe pa ngrohje, në shkollat pa ujë dhe pa banjo, në mungesë të laboratorëve të shkencave dhe teknologjisë, nuk e ndjejnë mungesën e disa kafshëve, gjysma prej të cilave plastike, të kopshtit zoologjik të rinovuar. Përpara se të kenë nevojë për vizita studimore në terren, ata kanë nevojë për minimumin e kushteve në shkollat, kopshtet dhe çerdhet e tyre.
Me sa duket, qytetarëve të Tiranës do t’u duhet të presin derisa këto probleme të shndërrohen në modele biznesi për drejtuesit e Bashkisë së Tiranës, siç janë bërë burim përfitimi edhe ndërtimi i disa shkollave që u rrënuan me pretekstin se ishin dëmtuar nga tërmeti. Ato kushtojnë disafish më shumë se sa shkollat që ndërtohen nga donatorët e huaj si BE apo qeveritë e vendeve perëndimore.
Dështimin e Bashkisë së Tiranës me institucionet e arsimit nuk mund ta mbulojnë as produktet e zyrës së propagandës, as kostot e fryra të shkollave që shembi dhe po rindërton Erion Veliaj. Ato duken qartësisht në performancën skandaloze të arsimit në Tiranë. Për fatin e keq të Veliajt, por më shumë për fatin e keq të të rinjve të Tiranës, kopshti zoologjik nuk mund të zëvendësojë shkollat, çerdhet dhe kopshtet e Tiranës. Në Tiranën kryeqytet të rinisë, ajo që i duhet më shumë rinisë duket se i intereson më pak Bashkisë.
Discussion about this post