Kryesia e Forumit Rinor të Partisë Demokratike, përmes 30 anëtarëve të kryesisë së tij iu i kërkoi zyrtarisht Sekretarit të Përgjithshëm të PD, Gazment Bardhi dhe kreut të Këshillit Kombëtar, Edi Paloka të thërrasin një referendum për vendimin mbi Sali Berishën.
Shkresa u dorëzua në selinë blu, një ditë përpara se Sali Berisha të dalë përpara demokratëve mbi nismën e tij për hapjen e partisë dhe thirrjen e një referendum për të rrëzuar vendimin e Lulzim Bashës, për largimin nga grupi parlamentar.
Menjëherë pas këtij vendimi, filluan aludimet se kreu i forumit, njëkohësisht anëtarë kryesie dhe deputet i PD, Belind Këlliçit duke mos reaguar menjëherë për këtë shkresë, u dyshua se mund të ishte dakord.
Por në një intervistë për mediat, Këlliçi u ka kërkuar demokratëve të ruajnë qetësinë. Ai gjithashtu thekson se PD për shkak të historisë së saj politike, nuk mund të dilte kundër SHBA-ve.
“Është një nismë e anëtarëve. Nuk ka pasur mbledhje. Kjo është një çështje e jona e brendshme që do marrë përgjigje, të gjithë duhet të reflektojmë në këtë moment në një qetësi absolute për të mirën e demokratëve. Marrëdhënia jonë me SHBA duhet të jetë e pacenuar” – është shprehur Këlliçi.
Firmën mbi kërkesën e thirrjes së një referendumi e firmosi edhe Glauk Olldashi, djali i të ndjerit, Sokol Olldashi, që konsiderohet si një person që ka marrëdhënie të mira me Lulzim Bashën.
