Deputeti demokrat, Flamur Noka ka reaguar pas vendimit të djeshëm të kryesisë së Partisë Demokratike për ta përjashtuar nga PD, atë dhe 7 demokratë të tjerë, përfshirë Sali Berishën.
Në reagimin e tij, Noka shprehet me ironi se shoqata e bravave mund të nxjerrë njoftime në media për këdo që ka nevojë për rregullime e ndërrime bravash, apo blindime dyersh e bunkerësh, por jo në emër të PD.
“Shoqata e bravave të bunkerit Alkatrazit paska njoftuar avancim me fushatën e përjashtimeve… Por shoqata nuk përfaqëson demokratët e as Partinë Demokratike. Demokratët me datë 11 dhjetor 2021 kanë miratuar në Kuvendin Kombëtar ngritjen e Komisionit të Përkohshëm të Rithemelimit të PD që i përfaqëson ata në çdo vendimmarrje. Shoqata mund të nxjerrë njoftime në media për këdo që ka nevojë për rregullime e ndërrime bravash, drynash, dyersh apo blindime dyersh, bunkerësh por jo në emër të PD”, shprehet Noka.
Në mbledhjen maratonë të Kryesisë që zgjati deri në orët e para të mëngjesit të sotëm, u vendos përjashtimi përgjithmonë nga PD i Sali Berishës dhe 7 prej mbështetësve të tij më të afërt.
Discussion about this post