Kryetari i Komunës së Prishtinës, Përparim Rama ka fajësuar Qeverinë e Kosovës për zhvendosjen e festivalit “Sunny Hill” nga Prishtina në Tiranë.
“Arsyeja se përse ky festival është i zhvendosur në Tiranë është për shkak të zvarritjeve të Qeverisë e cila pavarësisht se i gjithë procesi për dhënien në shfrytëzim të pronës komunale është bërë në pajtim të plotë me ligjin. Institucionet qendrore vazhdimisht kanë ndërhyrë në kompetencat e Kuvendit Komunal dhe në kompetencat e kryetarit të komunës”.
Nga ana tjetër, Rama ka ftuar qeverinë që të ndërmarrë veprimet e nevojshme dhe sipas tij të konfirmojë ligjshmërinë e vendimit të Kuvendit Komunal të Prishtinës ndërsa kishte një koment edhe për pronën prej 17 hektarësh, e cila do t’i jepej në shfrytëzim “The Sunny Hill” për 99 vite, në Bërnicë të Poshtme.
“Nuk e kam sjell unë 99-shin, e kam gjetur këtu sepse Qeveria e kaluar e ka vendos që kjo tokë t’i jepet në shfrytëzim për 99 vite. Kanë qenë tri pika për të cilat janë kërkuar për me u bo e ligjshme. Aspekti ka qenë publikimi i listës së pronave komunale, miratimi paraprak i listës së veçantë të pronave komunale dhe negocimi i ofertës me Sunny Hill”.
Së fundmi, Rama është shprehur se ka besim të plotë që festivali “Sunny Hill” nga viti tjetër dhe tutje do të jetë në Prishtinë.
Discussion about this post