Kryetari i Komunitetit Mysliman të Shqipërisë, Bujar Spahiu është takuar me Papa Françesku. Spahiu tregon se me Papën folën për dialogun ndër fetar, Dokumentin e vëllazërisë njerëzore të nënshkruar nga Shejhu i Al-Az’har, Ahmed Tajib dhe Papa Papa Françesku.
Ndër të tjera, ai shprehet se kanë komunikuar dhe për zhvillimet e përgjithshme në Shqipëri e rajon, ku i ka kërkuar Papës mbështetjen e tij personale dhe të shtetit të Vatikanit për Kosovën.
Postimi:
Ishte një kënaqësi të pritesha në një audiencë të veçantë nga Papa Françesku.
Patëm një bisedë tepër të ngrohtë dhe miqësore për më shumë se gjysëm ore.
Folëm për dialogun ndër fetar, Dokumentin e vëllazërisë njerëzore të nënshkruar nga Shejhu i Al-Az’har, Ahmed Tajib dhe Papa Papa Françesku.
Gjatë takimit kokë më kokë me Papën folëm për Shqipërinë, ai çmoi shumë harmoninë në vendin tonë, gjithashtu më shprehu falenderim për angazhimin tim personal dhe atë institucional në këtë drejtim.
E falenderova për pritjen, vlerësova shumë punën dhe kontributin që Papa po jep sa i përket vëllazërimit njerëzor, mbështetjen dhe vëmendjen e veçantë që ai tregon ndaj vendit tonë.
Kontributin dhe qëndrimet e tij ndaj luftës në Ukrainë dhe konflikteve të tjera të hapura nëpër botë.
Familja, kthimi i vëmendjes ndaj saj si qeliza bazë e shoqërisë, ishte mendimi i përbashkët që ndamë.
Gjithashtu folëm edhe për zhvillimet e përgjithshme në Shqipëri e rajon, me këtë rast i kërkova Papa Françeskut mbështetjen e tij personale dhe të shtetit të Vatikanit për Kosovën.
Më pas, pata një takim me Sekretarin e Vatikanit për Marrëdhëniet me Shtetet (Ministri i Jashtëm), imzot Paul Richard Gallagher dhe me Kryetarin e Këshillit Papnor për Dialogun Ndërfetar, kardinalin Miguel Ángel Ayuso Guixot.
Dua të falënderoj përzemërsisht Nuncin Apostolik në Tiranë, z. Luigi Bonazzi i cili ishte iniciatori i këtij takimi.
Gjithashtu i shpreh falënderimet e mia të përzemërta të ngarkuarës me punë të Republikës së Shqipërisë në Vatikan, znj. Majlinda Dodaj, e cila na priti dhe shoqëroi gjatë gjithë vizitës tonë në Vatikan.
Discussion about this post