Rexhep Ismaili, 66 vjeç, i cili humbi jetën mbrëmjen e kaluar pas një atentati të ndodhur në lokalin e tij në Sarandë, mbante prej vitesh edhe detyrën e kryetarit të Shoqatës “Çamëria” për degën e qytetit.
Pas ngjarjes së rëndë që tronditi Sarandën, ka reaguar edhe Shoqata “Çamëria” dega Vlorë, e cila ka kërkuar zbardhjen sa më të shpejtë të vrasjes dhe vendosjen e autorëve përpara drejtësisë.
Në reagimin publik, shoqata shpreh dhimbjen për humbjen e Ismailit, duke e cilësuar atë si një figurë të përkushtuar ndaj çështjes çame dhe një prej zërave më të fortë në mbrojtje të saj ndër vite.
“Me dhimbje të thellë njoftojmë ndarjen tragjike nga jeta të z. Rexhep Ismaili, Kryetar i Shoqatës ‘Çamëria’ Sarandë. Ai ishte një zë i palëkundur dhe mbrojtës i pashoq i çështjes çame që prej fillimeve të demokracisë. Shoqata ‘Çamëria’ dega Vlorë dënon këtë vrasje të rëndë dhe kërkon zbardhjen e menjëhershme të ngjarjes. Ngushëllime të sinqerta familjes dhe bashkëpunëtorëve. I paharruar qoftë kujtimi i tij!”, thuhet në deklaratë.
Discussion about this post