Kthesë në hetimet lidhur me procedimin penal për një 48-vjeçar në Golem të Kavajës, i cili u arrestua nën akuzën se kishte abuzuar seksualisht me të bijën 15 vjeçe. Kjo e fundit ka mohuar akuzën për të atin gjatë seancës gjyqësore për masën e sigurisë këtë të premte, duke u shprehur se denoncimin e bëri në shenjë hakmarrje pas një konflikti me të atin, për shkak se ky i fundit nuk e ka lënë të përdorte telefonin.
Që vajza nuk ka kryer marrëdhënie seksuale e vërtetoi dhe ekspertiza mjeko-ligjore.
Kallëzimi
Tre ditë më parë, policia njoftoi arrestimin e 48-vjeçarit B.R. për veprën penale “Marrëdhënie seksuale ose homoseksuale me të mitur”.
“Shërbimet e Komisariatit të Policisë Kavajë, pas kallëzimit nga një shtetase 15 vjeçe, se babai i saj kishte kryer marrëdhënie seksuale me të, gjatë 4 viteve të fundit, menjëherë kanë organizuar punën për verifikimin e këtij kallëzimi dhe arrestimin e autorit. Si rezultat i veprimeve të para hetimore, u vu në pranga shtetasi B.R., 48 vjeç, banues në Golem”, thuhej në njoftimin e bluve.
15-vjeçarja i ka thënë fillimisht të ëmës se është abuzuar e më tej psikologes së shkollës dhe është bërë kallëzimi në polici. Në dëshminë e saj, ajo ka dhënë edhe detaje rreth ngjarjes së supozuar, duke u shprehur se i ati abuzonte me të kur nuk kishte persona të tjerë në shtëpi, e kërcënonte dhe se përdhunimi ndodhte prej katër vitesh.
I ati nga ana tjetër, ka mohuar akuzat.
Tërheqja e vajzës
Në seancën e kësaj të premteje në Gjykatën e Durrësit, vajza është tërhequr nga kallëzimi, duke deklaruar se ato që kishte thënë në denoncimin e saj janë të gënjeshtra. Të njëjtin qëndrim ka mbajtur edhe e ëma e të miturës (bashkëshortja e 48-vjeçarit).
Detaje rreth asaj që ndodhi në seancë dha në një prononcim për mediat avokati i të akuzuarit, Ilia Ilia.
“Vajza ka pasur përplasje me të atin pas prej ditësh nuk e lejonte të komunikonte me telefon pasi i gjeti biseda të papërshtatshme me një shoqen e saj. Kjo ka sjellë dhe reagimin në mënyrë të njëanshme të vajzës”, tha ai.
“Vajza dhe e ëma e mohuan që ka ndodhur (përdhunimi). E bija pohoi që është bërë (sajesa e historisë) në mënyrë të papjekur, në një moment grindje. Në klasë të tretë ajo ka bërë një ndërhurje kirurgjikale dhe ka qenë pak e përkëdhelur nga prindërit se ka qenë dhe fëmija më i madh dhe kjo ka çuar në atë papërshtatshmërinë e saj të sjelljes, ka pasur një sjelle arrogante në raport me të atij. Kur i ati nuk ja toleroi më këtë lloj sjellje, ajo reagoi në këtë mënyrë”, tha avokati.
Ai deklaroi se klienti i tij “është shumë i rënduar” nga ana psikologjike lidhur me atë ç’ka ndodhur, ndërsa shtoi se “vajza ishte e qetë”. Ai pohoi se si e mitura ashtu dhe e ëma u tërhoqën edhe nga kërkesa për urdhër-mbrojtje, duke pranuar se 48-vjeçari nuk i ka dhunuar.
Pavarësisht mohimit të akuzës nga e bija, 48-vjeçari është lënë nën masën e sigurisë së arrestit në burg. Avokati i tij shpjegoi se në seancë, prokurori i çështjes tha se nuk e ka administruar ende aktin e ekspertimit që fakton se e mitura nuk ka kryer marrëdhënie intime.
“Në aktin e ekspertizës ka rezultuar se vajza ka qenë e defloruar. Këto janë çështje aq të mprehta sa zien opinioni, dhe ti nuk ke rezultatin e administruar?! Ekspertiza i rrëzon të gjitha“, u shpreh avokati.
Ai deklaroi se akuza nuk ka administruar as dëshminë e vëllait të adoleshentes, i cili, siç zbuloi, ka mohuar që i ati të ketë abuzuar me të motrën. Ilia Ilia hodhi dhe akuza për “njëanshmëri” ndaj gjyqtarit të çështjes.
Megjithatë, shtoi se ndaj vendimit do të bëhet ankim dhe shprehu bindjen se klienti i tij do të lirohet së shpejti nga qelia.
Discussion about this post