Nënkryetari i Lëvizjes Socialiste për Integrim ka reaguar pasi presidenti Ilir Meta ktheu në Kuvend ligjin për “Bashkëqeverisjen” me justifikimin se shkel Kushtetutën.
Vasili shkruan në Facebook se ligji për Bashkëqeverisjen është dëshmi e një qeverisje që nuk ekziston dhe që abuzon me pushtetin.
“Ky ligj i Bashkëqeverisjes është vetëm dëshmi e një qeverisje, që nuk ekziston, që abuzon me pushtetin e saj dhe që nuk u shërben për asgjë qytetarëve. Shqiptarët nuk kanë nevojë për spiunë rilindjeje të kryeministrit, por për shërbëtorë publikë që kryejnë punën e tyre”, shprehet Vasili.
Sipas tij, ky ligj synon centralizimin e pushtetit dhe kthimin e punonjësve në viktima të spiunëve të rilindjes.
“Ky centralizim i marrë, që kërkon të realizojë ky ligj është thjesht një sipërmarrje e çmendur e një kryeministri të çmendur, që do të shënojë dështimin e radhës, që do të rëndojë qytetarët. Ky ligj si një tumor që i kundërvihet Kushtetutës dhe që hyn në mes të disa ligjeve e bën këtë duke shpërbërë e asgjësuar edhe arritjet e vogla të sistemit administrativ shtetëror të arritura ndër vite. Kthimi i punonjësve shtetërorë në viktima të spiunëve të rilindjes, që synon të legalizojë ky ligj është kaq i çmendur sa edhe diktaturat do t’i linte pa gojë”, tha ai.
Vasili shkruan ndër të tjera, se ky është mjerim i madh për deputetët e rilindjes që votojnë çdo gjë që Rama u servir në tavolinë.
Discussion about this post