Shtatë persona kanë rënë në prangat e policisë mes tyre 4 elektricistë dhe faturistë të OSHEE-së pasi kishin kthyer bodrumin e një banesë në “shtëpi bari” ku kultivonin bimë narkotike kanabis.
Mësohet se, në kuadër të operacionit “Bushneshi” janë arrestuar Lek Allamani, Taulant Baroka, Gimi Hida, Xhemal Danieli, Xhevalin Kaca, Bib Gjergji dhe Alfred Fufi, katër prej tyre me detyrë elektricistë dhe faturistë pranë OSHEE Kurbin.
Arrestimi i këtyre personave u bë për veprat penale “Kultivimi i bimëve narkotike”, “Prodhimi dhe shitja e narkotikëve” dhe “Vjedhja e energjisë elektrike”, kryer në bashkëpunim, pasi në fshatin Bushnesh, Kurbin, kishin përshtatur katin e parë të një banese ku kishin bërë lidhje të paligjshme të energjisë elektrike, me aparatura që shërbejnë për kultivimin e bimëve narkotike.
Gjatë kontrollit të ambientit u gjetën dhe u sekuestruan 506 bimë të dyshuara narkotike cannabis sativa të kultivuara në vazo dhe 58 kilogramë e dyshuar lëndë narkotike cannabis sativa.
Në këtë ndërtesë u konstatua një lidhje e paligjshme e energjisë elektrike, e cila shërbente për furnizimin me energji të pajisjeve si llamba, aspirator dhe filtra ajrimi që ndihmonin në kultivimin e bimëve narkotike.
Gjithashtu, në cilësinë e provës materiale u sekuestruan të gjitha pajisjet që kanë shërbyer për kultivimin e bimëve narkotike, si: pajisje elektrike, llamba elektrike termale dhe lëndë ushqyese për bimët narkotike.
Discussion about this post