Tonelata me peshq kanë ngordhur në fshatin Vodëz në Kucovës, si pasojë e papërgjegjshmërisë së bashkisë vendase.
Hamza Qevani është fermeri që prej më shumë se 5-vjetësh kultivon peshq në rezervuarin e fshatit Belesovë dhe si pasojë e kontratës së lidhur me basenin e Fierit dhe të Korçës, paguan detyrimet e përcaktuara me ligj.
Hamzai tregon se ka investuar më shumë se 10 milionë lekë për të blerë rasatë peshku, por pikërisht në momentet kur peshku do të bëhej gati për treg, bashkia e Kuçovës hapi portat dhe brenda tre ditëve i gjithë rezervuari u boshatis, duke bërë që i gjithë investimi të shkojë dëm.
Hamzai shprehet se, për këtë dëm kolosal ai do t’i drejtohet institucioneve ligjore.
“Hapja e portave të rezervuarit është bërë nga keqmenaxhimi i punonjësve të bashkisë Kuçovë. Unë kam kontaktuar me Drejtorinë e Shërbimit në këtë Bashki, të cilët duhet ta hapnin dhe derdhnin ujin e rezervuarit brenda kuotave të përcaktuara, ndërsa tani rezervuari është kthyer në një vend të shkretë, pa ujë e pa gjallesa. Kam shpenzuar shumë para këtu dhe u fundosa nga ky veprim të papërgjegjshëm i bashkisë Kuçovë. Kërkoj të më dëmshpërblejnë për këtë humbje që më shkaktuan pasi kam shpenzuar gjithçka kam pasur, madje kam marrë edhe kredi për blerjen e rasatit të peshkut dhe për të mbuluar shërbimet e rritjes së tij, punëtorët e rojet. Tashmë jam i zhytur në borxhe deri në ngrykë, kjo është katastrofë”, ka thënë Qevani.
Zbrazja e rezervuarit të fshatit ka sjellë probleme dhe për të gjithë banorët e fshatrave Belesovë, Pëllumbas e Mendrakë, pasi uji i rezervuarit shërbente për blegtorinë dhe për vaditje.
“Kjo është katastrofë, ne po thahemi për pikën e ujit, kështu do të na ngordhin edhe bagëtitë”,-shprehen banorët.
