Dy persona kanë rënë në prangat e policisë në Lezhë. Burime nga policia për gijotina.com bëjnë me dije se mëngjesin e sotëm janë arrestuar personat e identifikuar me emrat Agron Manuka dhe Imer Losha 42 vjeç, banues në Durrës.
Arrestimi i tyre është bërë në kuadër të operacionit të koduar “Pllana”, në aksin e vjetër Milot-Lezhë.
Gjatë kontrollit të automjetit me të cilën dy personat po udhëtonin policia gjeti dhe sekuestroi në cilësinë e provës materiale: 30 kallëpe në formë cilindrike me lëndë eksplozive C-4, 17 kapsolla detonatore, 2 aparate celulare të lidhura me përcjellës elektrik, gati për t’u montuar me mina me telekomandë, si dhe një automjet.
Pritet që të arrestuarit në fjalë të përballen me akuzën për veprat penale “Prodhimi dhe mbajtja e armëve luftarake, armëve shpërthyese dhe municionit” dhe “Trafikimi i lëndëve plasëse, djegëse, helmuese dhe radioaktive”, kryer në bashkëpunim.
Sakaq nuk dihet ende se ku do e përdornin sasinë e lëndës plasëse, dyshim që do të zbardhet pas marrjes në pyetje të të arrestuarve.
Discussion about this post