Ish i Dërguari Special i Amerikës për dialogun Kosovë-Serbi, Richard Grenell ka trazuar sërish “ujrat” e rajonit të Ballkanit Perëndimor. Gjithçka ka nisur kur ai ka kujtuar Betejën e Kosovës, ku popujt e Ballkanit luftuan kundër Perandorisë Osmane. Postimi që Grenell bëri në rrjetet e tij sociale ka shkaktuar reagime të forta nga personazhë të ndryshëm, e gjitha pasi diplomati i referohet serbëve si “martirë të shenjtë”.
“Sot ne ndërrojmë heronjtë e Vidovdanit. Në këtë ditë më 1389, beteja kundër Otomanëve në Kosovë filloi. Sot është një ditë përkujtimi për Shën Princ Lazarin dhe martirët e shenjtë serbë,”– shkruan ai.
Pikërisht ky postim, i cili është shpërndarë në masë nga politikanë dhe personazhë të njohur nga Serbia, ka shkaktuar reagime të forta në Kosovë dhe jo vetëm. Përplasje personale Grenell ka pasur me ish-ambasadoren e Kosovës në SHBA, Vlora Çitaku, pasi kjo e fundit e korrigjoi se nuk ishte betejë e Serbisë por e të gjithë rajonit. Ndërsa vetë Grenell u shfajësua duke u shprehur se të gjithë në Kosovë ofendoheshin shumë lehtë nga çdo gjë.
Përveç ambasadores Çitaku, reagim ka pasur edhe nga personazhe të tjerë, si ish-deputeti Milaim Zeka, i cili e cilëson Grenell ‘idiot’ në histori që përzihet me ngjarje që nuk ka informacion, ndërsa gazetari Andi Bejtja kujton paralajmërimet e të shkuarës. Sipas tij, postimi është prova që Grenell ka ndërhyrë gjithmonë në stabilitetin e brendshëm të Kosovës, gjithmonë në favor të Serbisë.
