Në qytetin e Kukësit, mbetjet vijojnë të grumbullohen në dy pika kyçe të qytetit, pranë varrezave publike dhe tjetra në kodrat e Mamëzit në hyrje të qytetit.
Por, vendgrumbullimi i pozicionuar pranë varrezave publike të qytetit disa metra larg liqenit të Fierzës, është i rrethuar vetëm në anën e rrugës me një mur betoni, ndërsa pjesa tjetër e saj është e hapur, çka mundëson rënien e lirë të plastikës, gomave të makinave e mbetjeve të tjera drejtpërdrejt në liqen duke sjell një katastrofë mjedisore në liqenin e Fierzës dhe ndotje mjedisore në qytet pasi në jo pak raste mbeturinat digjen nga persona të papërgjegjshëm.
Kryetari i Bashkisë Safet Gjici, në një prononcim për mediat ka thënë se ndërtimi i landfillit rajonal në Tërthore me fonde të BE-së, do t’i jepte fund kësaj gangrene mjedisore dhe sipas tij, ky investim pritet të fillojë vitin e ardhshëm.
Ndërkohë, shërbimi i pastrimit dhe grumbullimit të mbetjeve ka qenë dhe vazhdon të mbetet një problem madhor për Bashkinë Kukës. Bashkia e Kukësit është përzgjedhur së bashku me 15 bashki të tjera të vendit nga BE për disa investime të reja të cilat kanë në qendër mjedisin.
