Humbja në ndeshjen e pare, me shifrat 3-1 përballë Vllaznisë, e vë paksa në presion skuadrën e Kukësit që të tentojë maksimumin ndaj Egnatias.
Edhe pse përballë do të kenë një kundërshtar që këtë sezon ka shpalosur objektiva të mëdhenj, në Kukës nuk i druhen këtij fakti.
Përpos humbjes, ana morale e skuadrës duket e mirë, sepse edhe pse një ekip i ri dhe në rindërtim e sipër, në Shkodër dhanë sinjale pozitive për vazhdimësinë në kampionat.
STRATEGJIA
Ndaj Egnatias pritet të jetë një përballje jo e lehtë për verilindorët që të dalin me një rezultat pozitiv, por gjatë gjithë kësaj jave Hallaçi ka qenë duke përgatitur strategjinë për të kapur “mat” kundërshtarin.
Tri janë shtyllat kryesore ku është fokusuar tekniku për këtë ndeshje, duke nisur fillimisht nga një mbrojtje e fortë që duhet t’u lërë sa më pak hapësira sulmuesve kundërshtarë.
Duke njohur potencialin e rivalëve në fazën ofensive, Hallaçi kërkon të marrë masat e duhura duke u dhënë udhëzime ekstra lojtarëve të tij që luajnë në prapavijë.
Shtylla e dytë ku duhet të fokusohen lojtarët do të jetë mbajtja sa më shumë e topit, duke mos ia dhënë kundërshtarit, edhe pse nuk është një mision i lehtë.
Me sferën në këmbët e tyre Hallaçi kërkon të nervozojë kundërshtarin dhe t’i zërë në befasi. Shtylla e tretë lidhet me daljet në sulm, duke shpresuar që La Torre dhe Rivasi të jenë në formën e tyre më të mirë dhe të shfrytëzojnë maksimalisht mundësitë që do t’u dalin përpara.
Një strategji me tri shtylla kryesore që në Kukës shpresojnë t’i vënë në zbatimnë këtë 90-minutësh, pasi një fitore do të ndihmonte shumë edhe në aspektin moral të skuadrës.
NDRYSHIMET
Sakaq, pritet që Kukësi të mos bëjë shumë ndryshime në formacion në krahasim me ndeshjen e parë, përpos ndonjë lëvizjeje në mesin e fushës.
Megjithatë, përveç disa lojtarëve që për momentin konsiderohen si shtylla dhe të paprekshëm në formacion, pjesa tjetër e tyre janë të gjithë në sitë dhe do të “luftojnë” për një vend në formacion, sepse edhe diferencat nuk janë të mëdha.
Gjithsesi, mbetet për t’u parë edhe lëvizja që do të bëjë tekniku në këtë ndeshje, sepse Kukësi i këtij sezoni është një mister për të gjithë./PanoramaSport
Discussion about this post