Komiteti Teknik i Ekspertëve ka vendosur që të mos ndryshojë masat anti-Covid të vendosura për frenimin e pandemisë së Covid-19, ndonëse në vendin tonë ka pasur një kulm infektimesh me koronavirus ditët e fundit.
Në mbledhjen e sotme të Komitetit, zëvendësministrja e Shëndetësisë, Mira Rakacolli, tha se shifrat e larta të infektimeve, që ditët e fundit kanë arritur nivel rekord nga varianti Omicron, nuk duhen parë me frikë, por me një shtim të vëmendjes ndaj respektimit të masave.
“Treguesit flasin për një tjetër valë. Shifrat nuk duhen parë me frikë, por me një shtim më të madh të vëmendjes dhe kujdesit. Komiteti mendon se niveli i masave mbrojtëse që kemi sot është në përputhje me situatën epidemiologjike”, tha Rakacolli.
Rritja sipas Komitetit të Ekspertëve ka ardhur nga festat e fund vitit dhe nga dy variantet Omicron dhe Delta. Në vend qarkullon edhe gripi dhe sipas Komitetit viruset po përhapen me nivele të larta, por sërish kjo nuk është arsye e mjaftueshme për të marrë masa më të rrepta.
Discussion about this post