Kristaq Kume, ish-kryetar i KQZ-së, u shpreh sot se në rastin e Bashkisë së Himarës nuk jemi në kushtet kur Fredi Belerit, kryebashkiakut të zgjedhur në 14 maj, i ndërpritet mandati.
Në një intervistë për Klan News, Kume tha se Beleri është në kushtet kur nuk po lejohet të bëjë betimin dhe jo në kushtet kur ai nuk do të bëjë betimin.
“Beleri dëshiron të bëjë betimin, por nuk e lejojnë, pra nuk mund t’I ndërpritet mandate”, tha Kume.
Lidhur me mbajtjen e zgjedhjeve në Rrogozhinë, Kume tha se Celibashi duhej të caktonte një datë, pasi nuk mund të mbahet peng kjo bashki, për shkak se pritet një vendim për Kuçovën apo për Kukësin.
“Në rastin e Kukësit gjithçka është në dorën e Këshillit të Ministrave, që duhet të njoftojë zyrtarisht Presidentin për vakancën e krijuar, në mënyrë që ai të caktojë një datë për mbajtjen e zgjedhjeve në Bashkinë e Kukësit.
Në Rrogozhinë, bazuar në vendimin e Kolegjit Zgjedhor, KQZ duhej të jepte një datë, dhe s’ka pse ta lidhë me zhvillimet në bashki të tjera, qoftë me Kuçovën, ku do të rinumërohen votat, ashtu edhe me Kukësin, ku duhet të shpallet vakanca”, tha ai.
Discussion about this post