Lëvizja qytetare që kërkon dorëheqjen e kryeministrit Edi Rama dhe largimin e qeverisë ka njoftuar zhvillimin e një proteste kombëtare më 1 gusht në Tiranë, duke bërë thirrje për pjesëmarrje të gjerë të qytetarëve brenda dhe jashtë vendit.
Pas zhvillimit të protestës së 61-të radhazi, organizatorët deklaruan se mobilizimi i radhës pritet të jetë një nga më të mëdhenjtë, me pjesëmarrjen edhe të shqiptarëve të diasporës.
Sipas njoftimeve të shpërndara në rrjetet sociale nga komunitetet e diasporës, protesta do të zhvillohet në Bulevardin “Dëshmorët e Kombit”, ku qytetarët janë ftuar t’i bashkohen tubimit.
Gjatë protestës së fundit u përsëritën thirrjet për dorëheqjen e kryeministrit dhe zhvillimin e zgjedhjeve të parakohshme. Organizatorët theksuan se kërkesa e tyre mbetet e pandryshuar dhe e panegociueshme.
Në tubim u dëgjuan edhe mesazhe që nxisnin pjesëmarrjen qytetare, ndërsa u bë apel për një mobilizim sa më të madh në protestën e planifikuar për 1 gusht.
Organizatorët e konsiderojnë pjesëmarrjen e diasporës një element të rëndësishëm të kësaj proteste, duke shprehur bindjen se tubimi do të shënojë një moment të rëndësishëm për lëvizjen qytetare.
Discussion about this post