Derbi nuk ka asnjëherë favorit, kjo është shprehje që gjen vend dhe në klasiken e Milanos të luajtur të mërkurën, aty ku kuqezinjtë e Conceicaos mposhtën rivalët e tyre zikaltër dhe prenë biletën për finalen e kupës së Italisë. Një duel në të cilin Milani u tregua cinik, duke shfrytëzuar mundësitë e krijuara e në fund shënuar 3 gola që mbajnë ndezur shpresën për të shpëtuar sezonin.
Si rrallëherë, kuqezinjtë realizuan në të gjitha shanset serioze të krijuara, teksa arritën të gjejnë avantazhin në minutën e 36’ me Luka Joviç, një bast i fituar nga trajneri portugez. Sulmuesi serb realizoi sërish në pjesën e dytë, ndërsa fitoren 3-0 e vulosi Reijnders, falë një aksioni të rrjedhshëm të Milanit. Në anën tjetër, Interi humbi disa mundësi shënimi me Lautaro Martinez apo Di Marco, duke humbur në fund dhe trofeun e dhënë mundësinë rivalëve të shkelin në finale.
Milani pret fituesin e çiftit Bolonja-Empoli, duel që luhet në mbrëmje. Sfida e parë u mbyll në shifrat 3-0, e me kualitetet që ka Bolonja pak gjasa ka të përmbyset, kështu që do të bëhet gati për të luajtur në finale me Milanin, një duel që pritet të jetë vërtet interesant, pasi skuadra e Vincenzo Italianos po kalon një formë të jashtëzakonshme.
Discussion about this post