Kupa e Shqipërisë/ Egnatia fiton në shtesë ndaj Tiranës

Egnatia është fituese e Kupës së Shqipërisë për sezonin 2022-2023.

Klubi nga Rrogozhina, triumfoi pas 120 minutash lojë, në finalen përballë Tiranës, e cila që në minutën e 25’, luajti me 10 lojtarë, si shkak i daljes me të kuq të Berishës.

Gjatë 90 minutave të kohës së rregull, asnjëra nga skuadrat nuk gjeti rrugën e rrjetës, me skuadrat që më shumë ‘menduan’ të koleksionin kartona të verdhë.

Për sa i përket rasteve për gol ama, Egnatia ishte më kërkuese por, Ilion Lika u tregua i vëmendshëm duke ndalur goditjet e sulmuesve kundërshtarë.

Në kohën shtesë, lodhja filloi të ndjehej te lojtarët e të dy ekipeve, me skuadrat që e dinin se një gol, do të vendoste gjithçka.

Pas 15 minutave të para pa gola, në 15 minutëshin e dytë, Egnatia zhbllokoi rezultatin. Pas një penalltie shumë të dyshimtë, të akorduar nga arbitri Enea Jorgji, klubi nga Rrogozhina realizoi me anë të Xhekson (114’), i cili mposhti Likën në goditjen e dytë pas humbjes së penalltisë.

Ky gol rezultoi, goli i fitores, me Egnatian që fitoi trofeun e parë në histori. Me këtë sukses, Egnatia fiton të drejtën për të luajtur në Superkupën e Shqipërisë, përballë Partizanit (fitues i Kategorisë Superiore).

REZULTATI FINAL:

TIRANA 0 – 1 EGNATIA
Goli: 114′ Xhekson