Përballja me San Marinon nuk është vetëm një sfidë për tri pikët. Gjashtë lojtarë të Shqipërisë duhet të bëjnë kujdes, pasi një karton i verdhë do t’i lërë jashtë ndeshjes së nëntorit ndaj Finlandës.
Vëmendja e Kombëtares shqiptare është e përqendruar te sfida me San Marinon, por trajneri Rolando Maran duhet të mendojë edhe për ndeshjet e muajit nëntor.
Një prej shqetësimeve kryesore të teknikut italian lidhet me disiplinën dhe, konkretisht, me kartonët e verdhë. Plot gjashtë futbollistë kuqezi rrezikojnë të mungojnë ndaj Finlandës nëse ndëshkohen në përballjen me San Marinon.
Bëhet fjalë për Berat Gjimshitin, Stavro Pilon, Ylber Ramadanin, Kristjan Asllanin, Anis Mehmetin dhe Myrto Uzunin.
Për Maranin, menaxhimi i situatës është veçanërisht i rëndësishëm, pasi ndeshjet e nëntorit pritet të kenë peshë të madhe për objektivat e Shqipërisë në këtë edicion të Nations League.
Asllani, Ramadani dhe Pilo, më pranë pezullimit
Në një situatë më delikate janë Kristjan Asllani, Ylber Ramadani dhe Stavro Pilo. Të tre kishin marrë më herët nga një karton të verdhë dhe ndodhen në rrezik pezullimi.
Një tjetër ndëshkim në sfidën me San Marinon do të thotë automatikisht mungesë në përballjen e radhës me Finlandën.
Në këtë situatë, çdo ndërhyrje dhe çdo debat me arbitrin duhet të menaxhohet me shumë kujdes nga futbollistët kuqezi.
Shqipëria ka përpara dy sfida të rëndësishme në nëntor, ndaj Finlandës dhe Bjellorusisë, dhe pikërisht këto ndeshje mund të jenë vendimtare për fatin e ekipit në Nations League.
Prandaj, përtej rezultatit ndaj San Marinon, Maran ka edhe një tjetër objektiv: ta mbyllë ndeshjen pa humbur asnjë prej lojtarëve kryesorë për shkak të kartonëve.
Discussion about this post