Ish- deputeti socialist, Spartak Braho, ka reaguar lidhur me deklaratat e Ramës ndaj SPAK. Në një intervistë televizive ai ka dhënë një paralajmërim të fortë mbi fakte të cilët mund t’i publikojë pas sulmit të kryeministrit Edi Rama ndaj SPAK. Braho tha se ka plot fakte dhe pas një jave do të jetë gati t’i publikojë ato. Ai u shpreh mes të tjerash se prokurorët duhet të mbrohen me ligj nga shteti, ndërsa shtoi se vendin tonë mund ta shpëtojë vetëm drejtësia.
“Unë do pres edhe një javë, më duhet të bëj verifikime. Ka çështje në hetim. Të majtë dhe të djathtë. Stuhia e faktit po punohet nga SPAK. Le të mos ndalemi në emra konkretë por le të themi edhe njëherë, lajmë duart nga SPAK. Në momentin kur politika përfshihet te drejtësia e bën të pasigurt prokurorin. Edhe ata prokurorë njerëz janë Këta prokurorë në SPAK dhe BKH kjo maxhorancë i emëroi. Tani pse i sulmon. Lëri të punojnë. Edhe krahu i Sali Berishës duhet hetuar. Këto janë probleme të cilat kërkojnë vëmendje të veçantë. Prokurori është njeri si të gjithë të tjerët”, deklaroi Braho.
Sakaq, ai ironizoi Ramën duke thënë se bën të tilla kërcënime kur dëshiron të “haj” ndonjë peshk. Me pak fjalë aktorët që nuk i hyjnë më në punë ai i çon në SPAK. “Edi Ramës kur i kujtohet të hajë ndonjë drekë me peshq dhe ngjala i kujtohen këto. Ai nuk e di çfarë është hetimi. Këtë shtet, këtë vend e shpëton vetëm drejtësia nga plaga, nga qelbi, nga korrupsioni i madh. Prandaj i them Ramës larg, mos flit më për SPAK. E ke prishur në maksimum këtë punë. Ngatërron edhe veten, edhe partinë”, tha Braho.
Discussion about this post