Kalimi i mjeteve në Tunelin e Llogarasë vijon të mbetet i ndaluar, pasi një defekt në traun e komandimit ka nxjerrë jashtë funksionit sistemin e hyrje-daljeve. Për këtë arsye, autoritetet menaxhuese, në bashkëpunim me Policinë Rrugore, kanë devijuar qarkullimin në rrugën e vjetër të Llogarasë.
Sipas raportimeve nga mediat lokale në Vlorë, reshjet intensive të shiut që kanë përfshirë zonën për një javë me radhë kanë shkaktuar prezencë uji në pjesën elektronike të sistemit të komandimit. Uji ka depërtuar në kabujt elektrikë dhe në njësinë qendrore të traut, duke e bërë mekanizmin të papërdorshëm.
Për shkak të mosfunksionimit të traut, autoriteti menaxhues nuk ka mundur të kontrollojë hyrjet dhe daljet e mjeteve, duke detyruar ndalimin e qarkullimit në tunel deri në riparimin e defektit.
Aktualisht, mjetet po kalojnë përmes rrugës së vjetër, ndërsa ekipet teknike po punojnë për rikthimin sa më të shpejtë të funksionimit normal të sistemit. Një njoftim zyrtar pritet të bëhet sapo situata të jetë stabilizuar.
Tuneli i Llogarasë u hap përkohësisht gjatë sezonit veror në korrik 2024, u mbyll nëntorin e atij viti dhe u rihap përfundimisht në maj 2025. Deri tani, kalimi ka qenë pa pagesë për të lehtësuar trafikun e sezonit, ndërsa nga tetori kanë hyrë në fuqi tarifat e reja të kalimit.
Discussion about this post