Selena Gomez ka dhënë së fundmi një intervistë për “Vogue Australia”, ku ka folur për lidhjet e saj të dashurisë. Më të bujshmet kanë qenë ato me Justin Bieber dhe The Weeknd, por këngëtarja preferoi të mos jepte emra në këtë prononcim.
“Mendoj se shumica e lidhjeve të mia kanë qenë të mallkuara. Kam qenë shumë e re për t’u ekspozuar ndaj gjërave të caktuara kur isha në një marrëdhënie. Kurrë nuk jam ndjerë e barabartë me partnerët e mi”, ka thënë Selena.
Ndër të tjera, ajo shtoi se fjala “Rare”, e cila ka dhe një linjë produktesh bukurie me të njëjtin emër, do të thotë kaq shumë për të ndërsa shpjegoi se mishëronte mënyrën se si ajo donte ta jetonte jetën e saj.
Kujtojmë se artistja ka folur shpesh për problemet e saj me shëndetin mendor dhe sot ka zbuluar cila ka qenë arsyeja që ka ndikuar më shumë në këtë pjesë. Artistja ka rrëfyer se ‘standardet e pamundura të bukurisë’ kanë pasur një ndikim shumë negativ në shëndetin e saj mendor.
“Shoqëria na tregon vazhdimisht se ne nuk jemi mjaftueshëm, kështu që unë desha të krijoja një brand për të sfiduar dhe eliminuar presionin, për të ndryshuar bisedën. Qëllimi im me Rare Beauty ishte që të thyeja këto standarde të pavërteta të bukurisë. Pashë nga eksperienca ime personale se si këto standarde të pamundura bukurie kishin një efekt në shëndetin tim mendor dhe njoh shumë njerëz që janë ndjerë në të njëjtën mënyrë”, është shprehur Selena.
