Kryeministri i Kosovës, Albin Kurti dhe ministrja e arsimit, Arbërie Nagavci bënë të ditur se nga 1 tetori, duke filluar nga viti akademik 2021/22 arsimi publik në nivelin Bachellor dhe Master do të jetë pa pagesë, ndërsa në studimet e Doktoraturës do të ketë lehtësime.
Deklarata u bë në një konferencë të përbashkët me ministren Nagavci, teksa Kurti tha se sistemi arsimor publik duhet të mbështetet në tek solidariteti shoqëror.
“Nga 1 tetori i këtij viti, duke filluar nga vitit akademik 2021/22 arsimi i lartë publik do të jetë pa pagesë për të gjithë ata që dëshirojnë të studiojnë në nivelin Bachelor dhe Master. Ndërsa, për studentët e doktoraturës do të ketë lehtësime të veçanta. Sistemi arsimor publik duhet të mbështetet në parimin e solidaritet shoqëror. Të gjithë qytetarët e Kosovës duhet të kenë qasje të barabartë në arsim cilësor,”- tha ai.
Ai informoi se ministrja Nagavci ka nënshkruar Udhëzimin administrativ me të cilën arsimi i lartë do të bëhet njësoj i aksesueshëm për të gjithë.
